Lori Batar no Fehuk Hamaus Povu Nia Laran

Filipi da Silva, Xefe Peskizador Universidade Dili (UNDIL). (Foto: STL/Crisogono Magalhães)

DILI, STLNEWS.co – Akademista UNDIL, kestiona programa Sesta Baziku neebe Governu trasa iha EE ba Dahitu hodi responde nesesidade povu iha tempu Covid-19 nia laran, tanba liu husi programa nee governu lori fali batar no fehuk ba hamaus povu nia laran iha EE ba Dahitu.

“Programa governu nian neebe hanaran Sesta Baziku nee diak, maibe apoiu hirak neebe governu oferese iha situasaun emerjensia nee maka tanba governu ba fahe fali batar ho fehuk,” kestaun nee hatoo husi Filipi da Silva, Xefe Peskizador Universidade Dili (UNDIL), ba STL iha nia knaar fatin, UNDIL, Segunda (16/11/2020).

Nia katak, iha Situasaun emerjensia nee povu persija maka Sembilan Bahan Pokok Sembako) tanba, sembako nee maka importante tebes ba ita nia sosiedade.

“Enkuantu governu iha duni orsamentu ho programa hodi hakarak ajuda no tulun nia komunidade sira iha situasaun estadu emerjensia, importante liu maka fahe sembako ba ita nia komunidade sira, laos ba fahe fali natar ho fehuk,” katak nia.

Nia haktuir, batar ho fehuk hahan orijin ita nia inan-aman sira neebe hela iha area remotas, tanba ita hotu hatene katak povu sira iha area remotas bain-bain sira konsumu ka haan hela batar ho fehuk, nunee husu ba governu atu halo mudansa ba iha sasan hirak neebe atu fahe ba ita komunidade sira neebe hela iha area remotas.

“Iha biban nee hau atu hatete deit ba iha Ministeriu Solidariedade Sosial no Inkluzaun (MSSI), atu trasa programa nee ho didiak, identifika duni fatin sira neebe merese atu hetan duni tulun, tanba ita hatene katak iha area remotas balu kareta no motor tama araska, nunee husu ba MSSI se bele tenki kobre hotu fatin sira nee,” tenik nia.*

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here