MAE – Embaixador Australia Inagura Dalan Sirtu No Valeta

DILI, STLNEWS.co – Ministru Administrasaun Estatal (MAE), Miguel Pereira de Carvalho hamutuk ho Embaixador Australia iha Timor Leste, Peter Roberts inagura dalan sirtu iha Suku Bidau Santana, Postu Administrativu Cristo Rei, Munisipiu Dili. Aleinde nee asina mos akordu subsidiariu ba programa partisipa 2021-2031.

Ministru Administrasaun Estatal (MAE), Miguel Pereira de Carvalho, hamutuk ho Embaixador Australia Peter Roberts halao inagurasaun projetu dalan sirtu ho distansia metru 367 iha Aldeia Sagrada Familia, Suku Bidau Santana, Postu Administrativu Cristo Rei, Munisipiu Dili.

“Projetu nee nuudar projetu Programa Nasional Dezenvolvimentu Suku (PNDS) regular husi faze 1 siklus III neebe finansia husi Fundus Governu Australia ho objetivu atu haforsa esforsu governu Timor Leste nia luta hasoru impaktu pandemia Covid-19. Apoiu finanseiru nee hanaran Fundus Resilensia Komunidade no Rekoperasaun Ekonomia (RKRE). Kustu total ba konstrusaun dalan sirtu ho valeta nee hamutuk rihun US$33.817,50, no adisional husi orsamentu PNDS regular hamutuk US$6.182,50 neebe US$9.000 uza ba selu traballadores inklui badaen sira no US$30.000 sosa material fabrikadu hanesan semente no besi. Total ema neebe servisu iha projetu nee hamutuk nain 42, neebe nain 30 hetan insentivu no feto nain 12 serbisu ho voluntariu,” dehan MAE Miguel Pereira, liu husi serimonia inagurasaun neebe realiza iha Bidau Santana, Aldeia Kolam Vitoria, Sesta (09/07/2021).

Nia afirma, orsamentu neebe aloka husi fundus RKRE, iha mos kontribuisaun osan husi komunidade hamutuk US$550. Aleinde osan iha mos kontribuisaun espasu rai husi uma kain 7 hodi konstrui dalan sirtu nee. Total benefisiariu ba projetu dalan sirtu nee hamutuk uma kain 526 ho total ema hamutuk 2.700 kompostu husi mane 1.422 no feto 1.278.

Entretantu Embaixador Australia, Peter Roberts haktuir, asina ona akordu ida ba tinan sanulu (10) ba programa PARTISIPA (Parseria hodi Haforsa Dezenvolvimentu Suku no Administrasaun Munisipiu) ohin loron, iha tempu hanesan inagura mos estrada urbanu foun ida no sistema udan been neebe hetan apoia husi Australia iha Bidau.

Tuir akordu Australia komprometidu hodi fornese osan ho montante millaun AU$80 (kuaze millaun US$60) hodi tulun Timor Leste nia Programa Nasional Dezenvolvimentu Suku neebe lidera husi komunidade sira no mos halao serbisu ho munisipiu sira hodi hadiak prontidaun serbisu no mantein infraestrutura, liu liu ba sistema bee iha area rural.

Embaixador Australia nee dehan, “Eventu asina akordu ohin loron nia ba arranjamentu subsidiariu ba programa partisipa reprezenta Australia nia komprometidu liutan ho osan millaun AU$80 hodi apoia estimula ba atividade ekonomia lokal, ho harii no reabilita infraestrutura kritiku sira hanesan sistema bee iha suku, estrada, ponte, eskola no klinika saude sira,” nia tenik.

Aleinde nee, aumenta ba iha arranjamentu nee, Australia investe ona osan extra ho total AU$17 (kuaze US$12,7) diretamente ba PNDS hodi tulun rekoperasaun ekonomiku husi Covid-19. Ho kontribuisaun ida nee, PNDS nia projetu 165 sei kompleta tinan ida nee no husi nee suku 244 mak hetan benefisiu ba tinan rua tuir mai.

Ponte no sistema udan-been iha Bidau inagura ona nuudar parte ba serimonia neebe mak hetan apoia finanseiru husi Australia. Sistema udan-been nee reduz impaktu negativu sira husi inundasaun foin dadauk iha tempu Paskua, ho membru komunidade Mana Ana dos Santos fo komentariu.

PNDS nuudar programa dezenvolvimentu ida neebe mak lidera husi komunidade sira halao iha Ministeriu Administrasaun Estatal nia okos neebe mak fornese osan (too US$50.000) ba suku sira hodi harii infraestrutura baziku. Too agora iha projetu 2.153 mak harii ona iha Timor-Leste laran, fo benefisiu ba timoroan nian, uma kain hamutuk2 300.000. Halao esforsu espesial hodi asegura prosesu foti desizaun ba empodera feto sira, ema vulneravel no marjinalidu sira, no ema ho defisiensia sira.*

Reportajen: Blandina Mauno
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

Covid-19 Update (26 Jullu 2021): Pozitivu 6, Rekoperadu 45, & Ativu 656

DILI, STLNEWS.co - Loron 26 fulan Jullu liu Centro Integrado Gestão de Crises, Sala Situação (CIGC-SS) rejistu kazu pozitivu Covid-19 iha nain 6, Dili...

Demisaun Membru PNTL 3, PN Rekonese Bazeia Ba Regulamentu

DILI, STLNEWS.co - Parlamentu Nasional (PN) liu husi komisaun B neebe trata asuntu defeza seguransa no negosiu estranjeiru rekonese demisaun membru Polisia Nasional Timor-Leste...

Komisaun F Seidauk Aprova Projetu Lei Protesaun Ba Labarik

DILI, STLNEWS.co - Parlamentu Nasional (PN) liu husi Komisaun F trata asuntu Saude, Seguransa Sosiais no Igualidade Jeneru, seidauk aprova projetu lei protesaun labarik...
%d bloggers like this: