MAE Sei Hari Uma 1262 Ba Kbiit Laek

Ministru Administrasaun Estatal (MAE), Miguel Pereira de Carvalho. (Foto: Espesial)

DILI, STLNEWS.co – Planu prioridade Ministeriu Administrasaun Estatal (MAE) iha tinan 2021, foka liu ba dezenvolvimentu rural, liu liu infraestrutura baziku ba suku, liu husi programa nasional do suku no sei halo uma ba povu kbiit laek hamutuk 1262.

Kestaun nee fo sai husi Ministru Administrasaun Estatal (MAE), Miguel Pereira de Carvalho ba STL, Iha MAP, Comoro, Dili, Kinta (21/01/2021).

“Ami nia planu prioridade ba tinan n 2021 nian maka, sei hadia uma sede suku sira hotu, no sei hari uma ba ita nia povu kbiit laek sira hamutuk 1262, tanba nee kada suku ida ami sei hari uma tolu, tanba hare ba kondisaun real ita nia povu iha suku no Aldeia sira nee balun mukit tebes, tanba nee presiza kria kondisaun ruma ba sira, tan nee maka ita sei hari uma kada suku ida, MAE sei hari uma tolu,” dehan Ministru nee.

Nia mos aforma liu tan katak, governu tenke kria kondisaun neebe diak ba iha munisipiu sira nee, atu nunee servisu iha munisipiu no suku sira nee mos bele iha kondisaun neebe diak, tanba servisu hotu hotu atu lao diak, maka kondisaun no fasilidade mos tenke diak.

“Hau hanoin uma neebe maka ami atu hari ba povu kbiit nee laek nee kuaze 1262, no agora dadauk sekretariadu PNDS hahu halo sosializasaun iha baze, liu liu munisipiu too iha suku no aldeia hodi identifika povu neebe maka moris kbiit laek duni, fiar katak bain hira tama ba fulan Marsu identifikasaun nee ba benefisiariu sira nee bele remata ona,” dehan Ministru nee.

Tuir nia katak, planu atu halo uma ba povu kbiit laek sira nee lalais tebes, tanba nee tarde liu fulan hat nia laran, tan nee fiar katak iha tinan ida nee nia laran, atividade hotu bele lao diak no tuir duni planu neebe maka Ministeriu trasa ona liu husi OJE 2021 nian.*

Reportajen: Madalena Horta/Jacinta Sequira
Editor: Ekipa STL

LEAVE A REPLY

Please enter your comment!
Please enter your name here