Merkadu Lautem Kondisaun Aat

LAUTEM, STLNEWS.co – Merkadu iha Postu Administrativu Lautem, Munisipiu Lautem kondisaun aat ba beibeik, tanba merkadu refere nee negosiante sira neebe faan iha neeba mak iha inisiativa hodi tau ai hodi faan modo, ikan, no seluk tan iha fatin refere.

Kestaun nee hatoo husi negosiante Maria da Costa ba jornalista STL iha merkadu Lautem, Kuarta (03/11/2021).

Kondisaun merkadu Lautem aat nee husi tempu okupasaun Indonezia too mai Timor ukun an mos sei nafatin hanesan nee, hodi negosiante sira faan iha fatin refere.

“Tinan barak merkadu nia kondisaun mak at hanesan nee, maibe ami kontinua faan ami nia sasan hanesan modo, tomate, ropolu, fehuk, talas, no seluk tan,” nia hatete.

Negosiante nee husu ba Governu sei bele halo kontrusaun merkadu ida ba negosiante sira neebe hakarak buka moris liu husi faan sasan.

“Ami husu ba Governu tau matan ba area rural hanesan ami iha munisipiu Lautem, tanba ami nia merkadu fatin neebe ho kondisaun aat, ami triste tebes tanba ami faan ona iha fatin aat hanesan nee husi Indonesia nian tempu too mai agora ami kontinua faan sasan hanesan nee,” nia esplika.

Iha fatin hanesan, Jose Oliveira nuudar negosiante faan ikan iha merkadu refere, sente triste tebes wainhira faan iha iha merkadu neebe ho kondisaun aat, tanba uluk Indonesia nia tempu fatin hanesan nee, maibe Timor ukun an mos kontinua faan iha merkadu neebe ho kondisaun la iha mudansa.

“Hau sente triste tebes, tanba kontinua faan ikan iha merkadu Lautem neebe ho situasan aat no la sufisente atu negosiante sira faan sasan, tanba liu husi bisnis hanesan nee mak foin hetan osan hodi selu oan sira nia eskola,” nia tenik.

Nia esplika tan, faan ikan mak dalan neebe diak atu hetan rendimentu, maske ituan maibe ida nee mak bele ajuda nia hodi susenta nesesidade familia uma laran.

“Loron ida hau hetan $10 ou $15 sei lae too $20, maibe kondisaun merkadu mak la mendukung ita atu faan iha nee, tanba fatin nee uza ai ho au hodi hali fatin para tau iha leten faan, maibe balun dodok ona no balun aat ona, entaun ami tau deit iha rai mak hodi faan,” nia esplika.

Observasaun jornalista STL iha terenu nota katak, merkadu Lautem kondisaun aat duni, tanba nee negosiante balun halo rasik iha uma hodi faan sasan iha laran, maibe balun kontinua faan iha fatin refere, sira uza merkadu antigu nian ida mak iha neeba, sira loron faan iha neeba, maibe loron Sabadu no Kuarta sira faan iha merkadu ida aat nee, tanba merkadu refere besik hela estrada dirasaun Com ba Lospalos Kota.

(jen)

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 4 Dezembru: Kazu Pozitivu 1 & Rekuperadu Nain 1

DILI, STLNEWS.co - Ohin loron, Sabadu (04/12/2021), Kordenadora Jeral Surtu Covid-19, Ministeriu Saude Timor Leste deteta tan kazu pozitivu ida (1) no rekuperadu nain...

PR Periodu 2022-2027 Presiza Tau Interese Ba Estadu & Povu TL

DILI, STLNEWS.co - Prezidente Republika (PR) ba periodu tinan 2022-2027 atu ukun husi se deit presiza mak tau interese ba estadu no povu Timor...

Lidera Enkontru G7+ Iha Lisboa, Xanana Kontinua Promove TL Ba Mundu

PORTUGAL, STLNEWS.co - Lider karismatiku Xanana Gusmão, nu'udar mos pesoa eminente g7+ kontinua promove Timor Leste ba mundu liu husi g7+, bainhira hamutuk ho...