MF Hahu Pagamentu Cesta Basica Faze Daruak Ho Montante Millaun $13,6

DILI, STLNEWS.co – Ministeriu Finansas (MF) hahu realiza pagamentu cesta basica faze daruak ho montante millaun $13,6 ba kompania fornesedor ai-han cesta basica hamutuk 53 neebe mak estabelese ona kontratu ho Ministeriu Turizmu, Komersiu no Industria (MTCI).

Pagamentu hirak nee halo hafoin MF simu pedidu pagamentu husi MTCI hamutuk 67 no MF realiza ona pagamentu 53. Pedidu pagamentu 14 tenke devolve ba MTCI atu kompleta rekezitus pagamentus tuir lei haruka hodi submete fila fali mai MF.

Tuir nota komunikadu neebe STL asesu iha Tersa (06/07/2021), sita katak hahu husi fulan Marsu 2021 too iha inisiu fulan Jullu 2021, MF realiza ona pagamentu cesta basica (Faze I no Faze II) hamutuk millaun $ 41,2.

Kompaña fornesedor sira (100%) kumpre sira nia dever hodi selu impostu rendimentu 0,5% husi sira nia total pagamentu ba Autoridade Tributaria, MF ho total kontribuisaun impostu hamutuk $206,4 mil. Inisiativa kompana lokal kumpre sira nia dever nee, fo mos implikasaun ba iha taxa ezekusaun Governu liu liu iha parte ezekusaun reseitas domestika neebe too iha 30 Junu 2021, atinje ona millaun $77,3 ka 41% husi total estimativa reseitas millaun $187,1.

Foin lalais nee, MF aprova ona CPV no PR foun cesta basica hamutuk 108: MTCI iha CPV 67 ho montante millaun $21,3, SEKoop CPV 17 ho montante millaun $7,9 no MAP CPV 24 ho montante millaun $2,9.

CPV no PR aprovadu hirak nee haruka fila fali ona ba ministeriu implementador sira hodi hahu prosesu aprovizionamentu interna iha ministeriu implementador idaidak no sei submete fila fali mai MF hodi halo verifikasaun molok realiza pagamentu.

Ministeriu Finansas liu hisi Sekretariadu Tekniku Fundu COVID-19, kontinua serbisu hamutuk ho ministeriu implementador sira atu konklui pagamentu cesta basica ba kompania lokal sira neebe mak fornese ona ai han ba komunidade sira.

Bazeia ba relatoriu husi Ministeriu Koordenador Asuntu Ekonomiku, too iha 14 Junnu 2021, benefisiariu sira neebe mak simu ona cesta basica hamutuk ema millaun ida rihun atus tolu (1.300.000) resin, ka 91,8% husi total benefisiariu hamutuk ema millaun ida rihun atus lima (1.500.000).

MF hakarak atu akresenta katak molok Sekretariadu Tekniku Fundu COVID-19 realiza pagamentu, kompania sira hotu tenke kumpre sira nia dever hodi ba selu sira nia impostu rendimentu (income tax) 0,5% husi sira nia total rendimentu konforme lei tributaria haruka. Kompania sira tenke aprezenta sira nia resibu pagamentu impostu rendimentu ba Sekretariadu Tekniku Fundu COVID-19 atu nunee bele realiza pagamentu final.*

Reportajen: Alberto Menezes
Editora: Josefa Parada

LEAVE A REPLY

Please enter your comment!
Please enter your name here

NEWS UPDATE

Covid-19 Update (26 Jullu 2021): Pozitivu 6, Rekoperadu 45, & Ativu 656

DILI, STLNEWS.co - Loron 26 fulan Jullu liu Centro Integrado Gestão de Crises, Sala Situação (CIGC-SS) rejistu kazu pozitivu Covid-19 iha nain 6, Dili...

Demisaun Membru PNTL 3, PN Rekonese Bazeia Ba Regulamentu

DILI, STLNEWS.co - Parlamentu Nasional (PN) liu husi komisaun B neebe trata asuntu defeza seguransa no negosiu estranjeiru rekonese demisaun membru Polisia Nasional Timor-Leste...

Komisaun F Seidauk Aprova Projetu Lei Protesaun Ba Labarik

DILI, STLNEWS.co - Parlamentu Nasional (PN) liu husi Komisaun F trata asuntu Saude, Seguransa Sosiais no Igualidade Jeneru, seidauk aprova projetu lei protesaun labarik...
%d bloggers like this: