MI Preve Ona Orsamentu Tokon US$ 5, Konstrui Postu UPF 6 No Eskuadra PNTL Aimutin

Vise Ministru Interior (VMI) Antonio Armindo hateten, orsamentu neebe governu liu husi Ministeriu Interior, preve atu konstrui postu UPF neen (6) hamutuk tokon US$ 2 ital, nunee mos tokon US$ 2 ital ba eskuadra PNTL Aimutin. (Foto: Espesial)

DILI, STLNEWS.co – Vise Ministru Interior (VMI) Antonio Armindo hateten, orsamentu neebe governu liu husi Ministeriu Interior, preve atu konstrui postu UPF neen (6) hamutuk tokon US$ 2 ital, nunee mos tokon US$ 2 ital ba eskuadra PNTL Aimutin.

“Ohin mai enkontru ho excelensia Primeiru Ministru (PM) Taur Matan Ruak, hanesan mos Ministru Interior hodi aprezenta konaba progresu projetu harii postu Unidade Polisia Fronteira (UPF) neen (6) no eskuadra Aimutin,” dehan Vise Ministru Interior (VMI) Antonio Armindo, wainhira remata enkontru ho Primeiru Ministru (PM) Taur Matan Ruak iha Palasiu Governu, Kinta nee (25/02/2021).

Nia dehan, dokumentu hotu dadaun nee iha ona Ministeriu Obras Publika (MOP), hodi haree no haruka ba ADN, enkuanto dokumentu konaba eskuadra Aimutin, Tersa semana oin MOP sei asina depois mak publika tender.

Nia hatutan katak, governu liu husi Ministeriu Interior preve ona orsamentu tokon US$ 5 hodi konstrui postu foun UPF neen 6, eskuadra Aimutin iha tinan nee.

“Orsamentu ita tau ketak ketak iha fundu infraestrutura, postu neen (6) ba UPF nee ketak, no eskuadra Aimutin nee ketak.Tanba nee orsamentu neebe preve atu konstrui postu UPF hamutuk 6 nee tokon US$ 2 ital, no tokon US$ 2 ital ba eskuadra Aimutin,” nia esplika.

Enkuantu postu ba Unidade Polisia Fronteira (UPF), sei harii mak ida iha Mota-ain, Tunu Bibi, Salele Suai, no rua iha RAEOA.

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here