MTCI-MCAE Lansa Sesta Bazika Iha Dili

Ministeriu Turizmu Comersiu Industria (MTCI), hamutuk ho Ministeriu Koordenador Asuntu Ekonomiku (MCAE), halao seremonia lansamentu nasional programa sesta baziku modalidade voucher ou kupon iha Munisipiu Dili. (Foto: STL/Jacinta Sequeira)

DILI, STLNEWS.co – Ministeriu Turizmu Comersiu Industria (MTCI), hamutuk ho Ministeriu Koordenador Asuntu Ekonomiku (MCAE), halao seremonia lansamentu nasional programa sesta baziku modalidade voucher ou kupon iha Munisipiu Dili.

Ministru Koordenador Asuntu Ekonomiku (MCAE), Joaquim Amaral hatete, MCAE neebe responsabiliza ba koordena planu rekuperasaun ekonomiku, ho nia medidas hat, neebe governu introdus, iha periode Junu too Dezembru, hamutuk ho Ministeriu implementador sira hotu.

“Programa hahu lansa pilotu iha 27 fulan Outubru iha Metinaro, iha altura nee ba inisiativa no responsabilidade nee MTCI mak halo lansamentu pilotu, husi nee ba servisu kontinua lao no forma kada Ministeriu implementador ida-idak halo,” dehan MCAE Joaquim ba jornalista, iha CCD, Sesta (04/12/2020).

Iha biban nee Ministru Joaquim hatete, bainhira atu redus importasaun husi liur, primeiru tenke hasae produsaun iha rai laran.

“Rekoperasaun ekonomia rai laran nee, labele alerjia ho sasan neebe la mai husi liur, dala ida tan ita nian ekonomia nee barak liu depende ba balansu komersial, maibe ho situasaun Covid-19 ida nee, ita hakarak osan sirkula iha rai laran, oinsa ita atu redus importasaun,” dehan Ministru Joaquim.

Governante nee hatutan, dalan legal neebe atu redus importasaun nee la bandu, maibe dalan legal mak oinsa atu hasae produsaun iha rai laran, tanba hasae produsaun atu nunee mehi redus importasaun nee bele sai duni realidade.

Iha fatin hanesan Ministru MTCI, Jose Lucas do Carmo da Silva, hanesan reprejentante lee mensajen Primeiru Ministru, Taur Matan Ruak hatete, tuir loloos ohin Primeiru Ministru Taur Matan Ruak mak mai halo lansamentu ba seremonia ida nee, maibe tanba iha seremonia importante labele husik, ho nunee delega Ministru atu bele reprezenta no lee diskursu Primeiru Ministru (PM), Taur Matan Ruak, oitavu governu konstituisional aprezenta planu rekuperasaun ekonomia, bele respende ekonomia afeitu negative.

Nunee mos, Vise Ministru Turizmu Comersiu Industria (MTCI), Domingos Lopes hatete, sesta bazika hanesan medida kurtu prazu ida temporariu husi planu rekuperasaun ekonomiku, neebe governu introdus ho objetivu atu halo mitigasaun husi impaktu Covid-19 sira imediatu, hodi loke dalan atu ba medidas sira neebe sei implementa iha tinan oin, no ba longu prazu nian.

“Ohin ita mai iha fatin nee, atu lansa sesta bazika ho modalidade voucher ka kupon iha Munisipiu Dili, neebe mak sei fornese konsumedores hamutuk 285,660, hanesan Cristo rei, Dom Aleixo, Nain feto, no Vera Cruz,” dehan nia.

Entretantu Seremonia lansamentu nasional programa “Sesta Bazika” modalidade voucher, halao iha Centru Convesaun Dili, neebe hetan partisipasaun husi Ministru Turizmu ComersiuIndustria (MTCI) Jose Lucas do Carmo da Silva, Vise Ministru Turizmu Industria (MTCI) Domingos Lopes, Ministru Koordenador Asuntu Ekonomiku (MCAE) Joaquim Amaral, Prezidente CCI-TL Oscar Lima, Administrador Postu Administrativu Munisipiu Dili, entidades sira seluk inklui funsionariu husi MTCI no MCAE.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here