Negosiante Dalan Ibun Husu Governu Foun Harii Merkadu

DILI, STLNEWS.co – Negosiante sira neebe faan iha dalan ninin senti tristi, tanba loron-loron Guarda Munisipiu Dili sempre duni beibeik sira, tanba nee husu ba governu foun tenki kria ka harii merkadu foun ba sira, atu nunee sira bele faan produtu lokal ho livre.

“Ita faan iha dalan ninin hanesan nee, tanba merkadu rua nakonu, maibe ita nia Guarda Munisipiu Dili nian la oras mai duni, tanba nee governu foun tenki harii tan merkadu foun ba ami, atu nunee ami halao negosiu ho livre,” hatete Negosiante Maria Olinda Guterres ba STL iha Comoro, Kinta (08/06/2023).

Nia dehan, espasu ba negosiante sira atu faan produtu lokal labele ona, tanba nee negosiante balu lori sasan faan iha koridor merkadu refere, maibe Guarda Munisipiu Dili sempre duni beibeik, nunee sira labele faan ho hakmatek.

Iha fatin ketak, Negosiante Carlito Fernandes husi Munisipiu Ermera, moris iha munisipiu la hetan osan, tanba nee lori bua ho malus mai sidade hodi faan atu sustenta ba nesisidade uma laran, maibe Guarda Munisipiu Dili duni sira.

“Hau iha foho hasoru susar ho terus ho osan 0,25 no 0,50 sentavos laiha, mak hau mai Dili hodi bua mai faan sustenta ami nia moris no selu labarik nia eskola, maibe Guarda Jestaun Merkadu duni ami ba mai,” nia esplika.

Nunee mos Jestaun Merkadu Taibesi haruka negosiante sira faan iha merkadu laran, maibe fatin laiha ona, negosiante sira nakonu atu faan iha neebe, tanba sira mos tenki faan iha trotoar leten, estasionamentu iha merkadu Taibesi.

Nia hatutan, iha munisipiu sira faan sasa folin laiha no ema la sosa, nunee sira lori sira nia produtu mai iha sidade atu sira mos hetan netik osan ruma hodi sustenta familia uma laran.

(jen)

LEAVE A REPLY

Please enter your comment!
Please enter your name here