Negosiante Faan Dalan Publiku, Risku Ba Vida

DILI, STLNEWS.co – Autoridade Munisipiu Dili haree atividade negosiu iha area lima neebé fo risku ba vida negosiante no komprador sira, tanba atividade negosiante sira okupa tama too estrada klaran.

“Area lima nee mak ita haree iha Elemloi, Rotunda Kampung Baru, Audian Klinika Foho Osan Mean oin, Bairo Pite no Bekora II, ita haree negosiante sira halo negosiu too tama iha estrada klaran, ida nee fo impaktu ba sira nia vida,” hatete Diretor Servisu Munisipal Jestaun Merkadu no Turizmu, Arthur Henriques ba STL iha Autoridade Munisipiu Dili, Sesta (02/06/2023).

Nia dehan, fatin sira nee vendedor sira faan sasan iha trotoar leten tama too estrada klaran, too agora mezmu ekipa patrulhamentu halo kontrolu hamutuk ho Polisia Eskuadra sira fo ona atensaun, sirkular eskrita ba sira, avizu no hakbesik aan ba sira.

“Maibe ohin fo hatene sira ses, kuandu ami nia ekipa ses aan husi terenu iha tuku 18:00 lokraik automatikamente sira okupa tortoar no estrada laran, tanba nee mak dala ruma ami foti medida prende sira nia sasan,” nia dehan.

Nia deklara, sira iha ona solusaun atu rezolve problema negosiante sira nian liga ho konstrusaun espasu merkadu tradisional, liu-liu estensaun merkadu Manleuana atu akumula vendedor hotu, maibe sei iha prosesu nia laran.

Iha fatin seluk, Xefi Suku Komoro, Eurico da Costa de Jesus deklara, atividade negosiu iha area Kampung Baru Komoro, nee risku boot tebes akontese dezastre no sai mos preokupasaun publiku nian.

“Ita haree liu-liu movimentu kareta ambulansia nian atu evakua pasiente iha tempu lokraik difisil tebes, maibe ida nee mak realidade, tanba seidauk iha merkadu tradisional propriu ida neebe bele akumula vendedor,” nia haktuir.

Nia dehan, nudar lideransa komunitaria lakohi atu halo asaun ruma ba vendedor sira nee, bainhira governu rasik seidauk iha kondisaun atu akumula negosiante hotu.

“Hau hatete deit katak, Timor oan sira neebe parte lokraik hanesan vendedor ambulante faan sasan iha neeba hau la hatene sira mai husi neebe,” nia informa.

Nia hatutan, sira neebe hela iha Dili, liu-liu iha suku Komoro nee, ema nia preokupasaun ekonomika loron-loron aumenta aas, tanba sira ba hola tiha sasan produtu lokal sira mai la faan husik hela loron rua tolu aat ona,” nia afirma.

Entretantu, dekretu lei numeru 33/2008 konaba ijiene orden publiku, bandu halo atividade negosiu iha espasu dominiu publiku estadu nian hanesan iha tortoar leten, estrada klaran, tanba nee sira halo asaun prende vendedor sira neebe viola lei nia sasan, tanba nee sasan sira nee ekipa sei prende no sei entrega ba institusaun sira neebe presiza, hanesan uma mahon no orfonatu sira.

(jen)

LEAVE A REPLY

Please enter your comment!
Please enter your name here