DILI, STLNEWS.co – Negosiante neebe halo atividade negosiu iha merkadu Taibesi kontinua faan iha trotoar leten, tanba balkon iha merkadu laran nee negosiante okupa hotu, nunee sira tenki faan iha trotoar leten hodi buka osan.
“Ami kontinua faan iha trotoar leten, tanba fatin iha merkadu laran laiha ona, ema idak-idak okupa hotu,” hatete Negosiante Merkadu Taibesi Armando Junior ba STL iha merkadu Taibesi, Segunda (17/07/2023).
Nia dehan, durante nee sira faan ba mai iha merkadu laran, tanba fatin atu tur hakmatek hodi faan sasan nee laiha.
“Durante nee ami faan mak buka netik US$ 1, US$ 2 hodi sustenta moris loron-loron, tanba nee Segurasan Munisipiu Dili labele duni ami ba mai, sira hatene mak duni deit ami, maibe sira la haree mos problema neebe ami hasoru,” nia esplika.
Iha fatin hanesan, negosiante dalan ibun Albertihna de Jesus informa, nesidade mak obriga hodi faan iha dalan ibun, hakarak faan iha fatin neebe dignu, maibe fatin negosiante sira prienxe hotu.
“Ami faan iha dalan ibun tanba nesesidade uma laran mak obrigda, ami mos hakarak faan iha merkadu neebe governu prepara ba ami, maibe ami nia maluk sira prienxe hotu, entaun fatin laiha ba ami atu faan,” nia deklara.
Nunee mos Prezidente Autoridade Munisipiu Dili (PAMD), Guilhermina Filomena Saldanha Ribeiro informa, governu liu husi Autoridade Munisipiu Dili, tuir lo-loos la autoriza tan ita nia vendadores sira atu faan iha dalan ninin, liu-liu trotoar nia leten.
Nia esplika, molok governu atu eziji ba negosiante sira labele faan iha dalan publiku, governu iha responsabilidade buka mos fatin apropriadu ida para sira mos bele halao atividade negosiu.
“Molok ita haruka labele faan iha dalan ninin no trotoar leten, ita mos presiza buka fatin ida neebe apropriadu ba sira, atu nunee sira mos halao atividade negosiu, tanba liu husi ida nee mak sira bele responde nesesidade loron-loron nian,” nia koalia.
Nia husu ba negosiante ambulante no negosiante nuu laloir sira tenki faan deit iha fatin ida, atu nunee labele halo sidade Dili sabraut.
Tanba nee, Autoridade Munisipiu Dili husu negosiante neebe faan ho karosa nee, sira faan deit iha area neebe mak sira faan ba, labele lao ba mai iha sidade laran.
(jen)
