DILI, STLNEWS.co – Negosiante neebe faan modo iha terminal Tasi Tolu halerik, tanba laiha kondisaun neebe diak, obriga sira halo negosiu iha rai rahun leten.
Negosiante Lucio da Costa ba STL Domingu nee (31/07/2022) iha terminal Tasi Tolu hatete, durante projetu be dalan nee lao rendimentu laiha, ema la mai sosa modo, tanba modo neebe faan iha nee nakonu ho rai rahun, aat liu tan mak kompanhia sira la ativu rega, no movimentu ba mai halo rai rahun sae hotu mai modo leten.
“Ami povu kiik tristi, tanba halo negosiu iha rai rahun nia leten, agora tempu bai loron, rai rahun suar liu-liu iha terminal ida nee, tanba projetu kee bee dalan lao hela, dala ruma loron ida kompnhia rega dala ida deit, dala ruma la rega tan, nee fo ameasa ba ami nia negosiu, ema la mai sosa ami nia modo tahan,” dehan nia.
Nia katak, ema hotu hakarak dezenvolvimentu iha rai laran nee lao, maibe tenki haree mos povu kiik neebe buka moris iha fatin nee, tan nee husu ba kompanhia atu rega hela deit estrada nee halo bokon, nunee rai rahun labele suar tan.
(mad)
