DILI, STLNEWS.co – Oras nee daudaun merkadu Taibesi espasu ba negosiante sira atu faan produtu lokal labele ona, tanba nee negosiante balu lori sasan faan iha koridor merkadu refere, maibe Guarda Munisipiu Dili sempre duni beibeik, nunee sira labele faan ho hakmatek.
“Merkadu ida nee jeral, tanba nee ami mai buka moris iha nee, maibe ami faan sasan la diak, tanba Segurasa Munisipiu Dili nia duni ami ba mai, ami faan mos la diak,” hatete Negosiante Abel dos Santos ba jornalista sira iha Merkadu Taibesi, Kuarta nee (29/03/2023).
Nia informa, Guarda Munisipiu Dili haruka negosiante sira faan iha merkadu laran, maibe realidade fatin mamuk laiha, tanba nee sira tenki lori lao sira nia produtu hodi faan iha koridor merkadu Taibesi.
Nia tenik, povu kiik mai sidade Dili buka moris la diak, tanba loron-loron mak duni hela deit negosiante sira iha nee, oinsa sira bele hakmatek hodi buka moris no sustenta ba familia uma laran.
“Loron-loron mak mai duni hela deit ami, ami atu sustenta ami nia familia no atende ba ami nia oan sira nia eskola oinsa, sei ami buka osan iha fatin nee la diak, sasan neebe ami faan mak bua no malus, maibe ema hola laiha, tanba sira duni hela deit ami,” nia esplika.
Iha fatin hanesan, Negosiante Negosiante Carlito Fernandes husi Munisipiu Ermera, moris iha munisipiu la hetan osan, tanba nee lori bua ho malus mai sidade hodi faan atu suseta ba nesisidade uma laran, maibe Guarda Munisipiu Dili duni sira.
“Hau iha foho hasoru susar ho terus ho osan 0,25 no 0,50 sentavos laiha, mak hau mai Dili hodi bua mai faan sustenta ami nia moris no selu labarik nia eskola, maibe Guarda Jestaun Merkadu duni ami ba mai,” nia koalia.
Nia dehan, Jestaun Merkadu Taibesi haruka negosiante sira faan iha merkadu laran, maibe fatin laiha ona, negosiante sira nakonu atu faan iha neebe, tanba sira mos tenki faan iha trotoar leten, estasionamentu iha merkadu Taibessi.
Nia hatutan, iha munisipiu sira faan sasa folin laiha no ema la sosa, nunee sira lori sira nia produtu mai iha sidade atu sira mos hetan netik osan ruma hodi sustenta familia uma laran.
(jen)
