Nesesidade Obriga Rofino Para Eskola

DILI, STLNEWS.co – Nesesidade iha familia uma laran la sufisiente, tanba nee obriga estudante Rofino Mota Freitas husi Munisípiu Bobonaro, Postu Administrativu Maliana hili dalan para nia eskola, hodi halo negosiu liu husi faan mina rai, ho objetivu ajuda nia alin sira nia eskola.

Ba STL Rofino hatete, tempu kiik nia halao estudu duni iha Eskola Primaria ida iha Bobonaro, maibe haree ba osan atu hola kadernu no ropa ba nia laiha, tanba inan aman laiha kbiit. loron kalan moris ho tos no natar, entau obriga nia para eskola iha tempu neeba. Nunee ho idade 15 ba leten nia mai buka moris iha Dili hodi faan mina rai, nunee hetan osan hodi haree fali nia alin sira neebe mak kiik hela iha foho.

Negosiante nee hatutan, nia mai iha Dili mos laos hela ho família sira, maibe hela iha kos mak buka moris. Fofoun ho osan oituan, hola uluk mina rai naton mak faan, no osan neebe mak nia hetan hodi selu kos no balun haree fali nia alin sira, no oras nee nia alin ida mak hela ho nia no eskola iha IOB.

Oras nee governu implementa serka sanitaria dalan taka hotu, maibe nia hili dalan faan nafatin mina rai tanba nesesidade mak obriga.

“Tanba ami iha nee, kos nee, mak ami faan, agora dadaun dalan sira mos taka hotu hanesan nee, kos nain atu husu osan ami osan laiha entaun ami tenke faan buat sira nee,” dehan nia iha Elemloi, Domingo (21/03/2021).

Nia hatutan, uluk seidauk implementa serka sanitaria mina rai neebe mak nia faan kada loron bele hetan $20 too $25, maibe agora susar tanba ema ladun sai hodi sosa.

Rofino hatutan, bainhira nia hili dalan para eskola nia mai kedas hela iha Dili hahu iha tinan 2012 too agora.*

Reportajen: Emerenciana Pinto
Editora: Ekipa STL

LEAVE A REPLY

Please enter your comment!
Please enter your name here