OJE 2020 Pasa; TL Sai Husi Inserteza Politika

Deputada husi Bankada KHUNTO, Olinda Guterres. (Foto: Facebook)

DILI, STLNEWS.co – Ho Orsamentu Jeral Estadu (OJE) 2020, neebe pasa iha Parlamentu Nasional, lori Timor Leste sai ona husi inserteza politika.

Kestaun nee hatoo husi Deputada Olinda Guterres, liu husi deklarasaun politika Bankada KHUNTO, iha PN, Dili, Kinta (08/10/2020).

Nia dehan governu da-8 neebe infrenta situasaun difisil hanesan inserteza politika halo estadu moris ho duadesimu.

Nunee mos aumenta tan ho pandemia COVID-19, maibe governu nafatin reziste hodi servi povu no Estadu.

“Ohin Parlamentu Nasional aprova ona OJE 2020, ho aprovasaun ida nee lori Timor Leste sai husi inserteza politika, hodi restaura fali konfiansa povu ba lideransa nasaun nian,” dehan nia.

Ho pandemia COVID-19 halo mundu tomak preokupa, tanba afeta makas ba ekonomia pais nian iha Timor Leste, governu nia estratejia foun ba dezenvolvimentu nasional, maka hahu ho medidas ba rekuperasaun ekonomika.

Politika rekuperasaun ekonomika neebe governu sei hahu ho sesta bazika neebe ho objetivu klaru, sei fo duni benefisiu ba povu.

“Ami apoiu politika ida neebe atu kore korente depedensia ba importasaun neneik no bebeik ita sei garantia soberania ai-han iha rai laran,” dehan deputada nee.

Nia hatutan dezafiu Timor Leste nian maka kiak, oinsa atu kria empregu hodi observa trabaladores no diversifika ekonomia hodi garentia kresimentu ida sustentavel.

Tanba governu iha oportunidade boot ba empregu redusaun kiak no dezeigualidade, tanba nee presiza desizaun sira neebe agresivu, atu propoin medida estuturante hodi lori mudansa ekonomia ba longu prazu no dezenvolvimentu nasional.*

Reportajen: Domingas Soares/ Guilhermina Franco
Editora: Carme Xiemenes

LEAVE A REPLY

Please enter your comment!
Please enter your name here