OJE 2020, Viola Normas Orsamental

Ofisial Programa AJAR, Inocencio de J. Xavier. (Foto: STL)

DILI, STLNEWS.co – Sosiedade Sivil konsidera Orsamentu Jeral Estadu 2020 neebe aprova iha Outobru, lalos, tanba viola lei normas Orsamental nian.

Ofisiais Programa sosiedade sivil Ajar Inocencio de Jesus Xavier hatete, orsamentu ida neebe maka tuir lei, orsamentu Outobru nee orsamentu 2020-2021 nian, neebe tuir regras orsamentu nian.

“Hau lahatene sira keta muda ona lei orsamentu nee ka lae, lei orsamentu 2019 ba 2020 aprova iha outobru, ezekusaun nee iha 2021 nee buat ida neebe maka tuir lei lalos, tuir hau nia pontu de vista nee lalos, viola ona lei normas orsamental nian,” dehan Inocencio ba STL iha nia knaar fatin Farol, Segunda, (12/10/2020).

Nia hatutan, tuir regras orsamentu normal iha lejislativa ida, nee mai ho anu orsamental, anu orsamental katak 2019 no 2020 tenki tama iha Outobru 2019, para vigora ba implementa iha 2020, labele iha 2019 nian , aprova fali iha 2020 -2021, nee viola ona lei normas orsamental nian.

Montante OJE neebe boot, governu ho referensia orsamentu COVID-19 nian, lakonsege ezekuta sa tan ho orsamentu 1.4 bilioes sei lakonsege, ho osan neebe maka boot sei iha tentativa ba korupsaun no mal-administrasaun. Sei difikulta mos prosesu fiskalizasaun distintus deputadus sira nian liuliu opozisaun sira, tanba haree orsamentu nia rasionalidade lolos no logika orsamentu Parlamentu sira neebe maka afavor ba orsamentu nee, nia logika lolos ba teknika ezekusaun laiha.

“Sira nia apoiu afavor ba orsamentu tinan nee, orsamentu ida mai ho tendensia politika, tanba kapasidade no rasiosinu gastus ba ezekuasaun nee labele ho biliuan 1.4, nee ezekuta iha fulan rua ka tolu nia laran, ida nee sei labele konsege,” tenik Inocencio.

Nia konsidera orsamentu nee iha boot liu kapasidade governu nian, tanba orsamentu COVID-19 neebe maka aprova no fo ba ministeriu sira balun ate agora seidauk gasta hotu, liuliu ministeriu saude nian. Mesmu iha hotel sira neebe governu aluga hodi oferese ba ema sira kuarentena, to agora seidauk halo pagamentu. Tanba nee ho referensia hirak nee, governu ida nee ho nia estrutura governu ida neebe ke boot, ho asesor ida neebe ke barak, ita hare OJE ida agora 2019 -2020 orsamentu ben servisu maka boot liu, kapital menor laiha, kapital dezenvovimentu laiha, nee signifika orsamentu nee laos benifisiu ba povu. Sei lahadia povu nia preokupasaun, hanesan estrada, bee mos, sei lahadia saude ho kualidade, maibe sei sosa seit kareta ba deputadu sira, ba deit orsamentu operasional no fo deit salariu ba asesor no ministru sira, tanba povu selu sira durante tinan tolu nee, selu matak deit, sei lahalo buat diak ida ba povu.

“Ami hare katak orsamentu nee viola direitu sidadaun nian, oinsa hare ba kualidade direitu edukasaun, direitu ba saude, direitu ba bee mos, direitus ba eletrisidade, nee viola perspetiva direitus humanus, OJE nee atu produs politika publiku, neebe faz parte iha kuartu direitus humanus nian,” komenta Inocencio.

Antes nee sosiedade sivil hatete ona katak, governu tenke husu osan kiik tuir kapasidade, labele hatudu ambisaun ida neebe ke boot, maibe lahatene ezekuta, nee problema, se bainhira lahatene ezekuta , maka to fulan ikus hanesan Dezembru ministru sira sai hotu ba rai liur, hodi gasta osan sira nee too hotu, povu nafatin halerik. Tanba nee aprova orsamentu tinan ida nee, laiha benifisu ba povu, larefleta ba povu, no laresponde ba nesesidade povu nian, atu mai fo benifisu ba grupu politiku sira, inklui asesor sira.*

Reportajen: Santina Castro
Editora: Ekipa STL

LEAVE A REPLY

Please enter your comment!
Please enter your name here