OJE 2021 Tenke Liberta Povu Husi Kiak

Jurista Avelino Coelho. (Foto: Pajina Facebook Avelino Coelho)

DILI, STLNEWS.co – Orsamentu Jeral Estadu (OJE) 2021 ho montante biliaun US$1.895, neebe aprova iha Parlamentu Nasional, governu tenke ezekuta hodi liberta povu husi kiak no mukit.

Jurista Avelino Coelho hatete, orsamentu neebe aprova tanba kompetensia parlamentu nian, nunee orsamentu aprova ona signifika iha tinan oin iha OJE, agora oinsa maka orsamentu nee bele liberta povu kiak sira, ida nee maka fundamental.

Nia hatutan governu presiza hare programas dezenvolvimentu saida maka governu atu halo iha tinan oin, atu nunee bele haree orsamentu nee atu benifisia ba povu maubere ou lae. See wainhira labenifisia maka povu maubere sei haree opsaun seluk iha eleisoens neebe sei mai, dalan maka ida nee, laiha dalan seluk.

“Ba hau orsamentu boot nee diak liu tan, importante maka OJE nee tenki liberta duni povu no dezenvolve ekonomia povu nian, see wainhira orsamentu ho montante boot maka la rezolve povu nia problema, hanoin katak presiza hadia politika estadu nian ba povu,” dehan jurista nee iha salaun Katedral, Dili, Tersa (15/12/2020).

Nia dehan, partidu sira neebe
manan povu fo konfiansa, maibe nia ukun tinan lima, nunee agora povu maka tenke haree, partidu ida neebe maka sira hili nee ukun tinan lima nee benifisia ba sira iha kalae, see labenifisia tinan lima mai fali povu tenki hili fali dalan seluk, tanba ida nee maka demokrasia.

“Hau kualker orsamentu atu kiik ka boot laiha kestun, importante maka liberta duni povu husi kiak no mukit, ida nee maka dalan rua deit, sistema kapitalismu no sistma sosialista,” dehan nia.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here