OJE Lamai, Informasaun Falsu

Diretor Ezekutivu FONGTIL, Daniel Carmo dos Santos. (Foto: STL/Santina Castro)

DILI, STLNEWS.co – Diretor Ezekutivu FONGTIL, Daniel Santos do Carmo hatete, informasaun ida dehan Orsamentu Jeral Estadu (OJE) neebe aprova sei lamai Timor Leste ida nee falsu ou laloos, tanba Primeiru Ministru rasik halo ona deklarasaun ba iha publik. Dehan Daniel ba STL, iha nia knaar fatin Caicoli, Dili, Kuarta (13/01/2021).

“Xefe governu mos koalia ona no Banku Sentral mos koalia ona katak laiha problema konaba OJE, entaun sosiedade sivil mos ami hanoin katak informasaun sira dehan osan lamai nee laloos, tanba nee ita tenke fo atensaun no fo sai informasaun ba ita nia komunidade sira ho loloos labele halo fali ita moris deit ho rumoris, nee bele halo komunidade iha area rural, suku, no aldeia sira bele paniku,” dehan nia.

Nia mos husu ba Sekretariu Estadu Komunikasasaun Sosial, Ministeriu relevante no mos estrutura governu iha munisipiu atu transmite informasaun neebe loloos ba populasaun sira iha area rural, tanba iha konstitusaun hatete katak sira mos iha direitu atu asesu ba informasaun neebe loos, labele inforamasun bosok.

“Sekretariu Estadu Komunikasaun Sosial atu oinsa maka bele halo koordenasaun ho Prezidente Autoridade Munisipiu sira, atu bele fahe informasaun ba komunidade sira, ho informasaun neebe loos,” dehan nia.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here