OJE Seidauk Mai, Responsabilidade Governu

Program officer Asia Justice and Rights (AJAR), Inocencio Xavier. (Foto: STL/Santina Castro)

DILI, STLNEWS.co – Orsamentu Jeral Estadu (OJE) neebe aprova ona maibe to oras nee seidauk mai Timor-Leste, nee responsabilidade governu da-8 neebe lidera husi Primeiru Ministru Taur Matan Ruak.

Kestaun nee hatoo husi Program officer Asia Justice and Rights (AJAR), Inocencio Xavier ba STL, iha nia knaar fatin Farol, Dili, Segunda (21/12/2020).

“Hau lahatene tanba sa maka Parlamentu Nasional aprova tiha ona Orsamentu Jeral Estadu, maibe osan nee seidauk mai, nee fila fali ba iha responsabilidade governu nian, tanba iha PN aprova tiha ona, agora situasaun nee Ministriu Finansa no Banku sira maka tenke halo servisu,” dehan Inocencio.

Nia dehan, se dehan kestaun politiku maka PN aprova tiha ona OJE 2021 nee no mos OJE 2020 nian aprova tiha ona, maibe lahatene osan nee iha neebe, nee fila ba governu nia responsabilidade.

Informasaun espalla iha publiku politiku sira hare katak, tanba governu nee laiha lejitimidade no tanba violasaun konstituisaun, prezidente PN nia pozisaun mos laliu husi dalan pasifiku.

“Hau laharee kestaun politiku ida nee, maibe nee kestaun tekniku, tanba foin lalais banku xefe governador hatete katak Timor Leste laiha problema ho orsamentu iha Federal Estadu Amerika, entaun signifika ita laviola buat ruma iha situasaun nee,” tenik Inocencio.

Inocencio hatutan, see esplikasaun husi governador banku Timor Leste katak, laiha ona kestaun politiku ruma, entaun fila fali ba esforsu ministeriu nian, tanba sa maka osan nee lamai.

Bainhira estadu ida lao tenke iha OJE, tanba governu iha nia planu barak, maibe tenke iha OJE atu bele selu funsionariu sira, eis titular sira, ba mega projetu sira, no mos infraestrutura sira neebe maka liga ho povu nian, see ida nee maka laimplementa, konserteza iha krizi finanseiru.

“See governu ida moris laiha OJE atu finansia atividade, diak liu ba eleisaun foun hakarak ka lakohi, ita labele tau espresaun boot sira kontinua simu osan, sae kareta diak, maibe povu la goja buat ida iha ukun,” nia esplika.

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here