Orsamentu Ba Edukasaun, Saude, Agrikultura, Saniamentu Kiik

Sosiedade sivil liu husi Lao Hamutuk rekonese iha proposta Orsamentu Jeral Estadu (OJE) 2021, governu aloka persentajen neebe kiik ba iha setor edukasaun, saude, agrikultura no fornesimentu bee moos no saneamentu. (Foto: Pajina Facebook Lao Hamutuk)

DILI, STLNEWS.co – Sosiedade sivil liu husi Lao Hamutuk rekonese iha proposta Orsamentu Jeral Estadu (OJE) 2021, governu aloka persentajen neebe kiik ba iha setor edukasaun, saude, agrikultura no fornesimentu bee moos no saneamentu.

Peskizadora Lao Hamutuk, Eliziaria Febe Gomes hatete, tinan barak ona, governu hatoo ninia kompromisu katak sei tau atensaun aas liu ba setor edukasaun, saude, fornesimentu bee moos no saneamentu. Infelizmente, alokasaun orsamentu ba setor hirak nee la refleta iha politika OJE nian kada tinan.

“Proposta OJE 2021, ami rekonese katak governu aumenta persentajen kiik iha setor xave sira, maibe nafatin la too atu bele responde ba situasaun real neebe povu kiik sira hasoru,”dehan nia iha Salaun FONGTIL, Caicoli, Kuarta (18/11/2020).

Nia esplika husi grafiku OJE nian neebe lao hamutuk iha, setor Edukasaun iha 10%, saude 6%, bee no sanementu 0.7% , Agrikultura 2.2% maibe kada tinan governu nia prioridade maka edukasaun saude bee mos no agrikultura maibe husi oje nee sira hamutuk hetan 18% husu orsamentu total.

Alokasaun hirak nee ho razaun atu atinje objetivu husi Planu Rekuperasaun Ekonomia deit. Ezemplu balu hanesan alokasaun orsamentu ba setor edukasaun aumenta ho 69% kompara ho 2020, no 29% kompara ho 2019.
Haree ba alokasaun iha setor edukasaun nudar persentajen husi OJE tomak, alokasaun ba edukasaun iha proposta OJE 2021 mak 9.8%, kompara ho 7.3% iha 2020 no 9.7% iha 2019.

Mudansa numeru hirak nee, sira nota katak nafatin la tuir pratika diak tuir padraun internasional neebe normalmente Governu tenke investe 30% husi orsamentu tomak ba edukasaun no saude.

Bazeia ba Livru 2, alokasaun ho montante tokon $5.1 husi setor edukasaun barak liu ba sistema Eskola Cafe neebe realidade la fo oportunidade ba labarik sira hotu atu hetan no asesu kualidade edukasaun neebe diak no hanesan.

Tanba nee, presiza halo avaliasaun molok haluan eskola refere, hodi evita posibilidade gasta osan barak maibe laho rezultadu optimal tantu ba manorin nain sira no mos ba labarik sira.

Sosiedade sivil nota mos mudansa balu iha alokasaun ba setor importante sira seluk hanesan setor saude neebe aumenta ba tokon $106 ka aumenta 44% kompara ho mediu sira iha 2020, no 34% kompara ho 2019. Haree ba alokasaun ba saude nudar persentajen husi OJE tomak, alokasaun ba saude iha proposta OJE 2021 mak 5.6%, kompara ho 4.5% iha 2020 no 5.1% iha 2019.

“Ami nafatin enkoraja governu hodi halo investimentu ida neebe diak liu, hodi fornese fasilidade saude neebe adekuadu no asesivel ba ema hotu,”tenik nia.

Nia akresenta, rezultadu husi Modelu Orsamental foun, susar tebes atu hatene alokasaun ba bee moos no saneamentu, hanesan diskute iha leten. Bazeia ba informasaun neebe iha, setor bee moos no saneamentu hetan deit 0.7% husi total OJE 2021.

Tanba nee presiza hatene alokasaun ba setor importante nee hira, hodi bele hatene Governu nia prioridade. Tanba nee, sira sujere mos atu Governu tau nafatin atensaun aas ba direitu baziku povu nian nudar responsabilidade estadu nian.

Espera katak povu neebe merese liu atu hetan tulun husi estadu labele adia tan ba tempu inserteza iha futuru, maibe tempu ona atu investe duni ba diresaun loloos hanesan sira mensiona iha leten atu akomoda direitu no interese sidadaun sira neebe vulneravel no merese liu atu hetan apoiu.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here