Oxfam Husu Governu Aloka Orsamentu Ba Agrikultura

Organizasaun Naun Governamental (ONG) Oxfam, husu governu atu aloka OJE 2021 ba agrikultura, tanba agrikultura sai fonte prinsipal ba sustenta familia iha Timor Leste. (Foto: Oxfam)

DILI, STLNEWS.co – Organizasaun Naun Governamental (ONG) Oxfam, husu governu atu aloka OJE 2021 ba agrikultura, tanba agrikultura sai fonte prinsipal ba sustenta familia iha Timor Leste.

Porgram Manajer Oxfam, Lucio Savio hatete, Timor Leste nia ekonomia depende ba fundu petroliferu, sai nudar fundu uniku hodi viabiliza ekonomia rai laran. Governu Timor-Leste kada tinan halo levantamentu ba setor hotu-hotu inklui ba mega projetu sira (Projetu Tasi Mane no ZEEMS) neebe hetan porsaun boot liu kompara ho setor agrikultura, turizmu, edukasaun no saude.

Tanba nee Oxfam husu ba Governu Timor-Leste atu dezena planu klaru no aloka orsamentu hodi diversifika ekonomia, liu-liu hasae produsaun agrikola no setor informal no investe iha kapital umanu, atu sustentabiliza no dinamiza ekonomia rai laran.

“Ami husu Parlamentu Nasional iha debate Orsamentu Jeral Estadu 2021, atu konsidera asuntu hanesn Investe iha agrikultura no apoiu merkadu lokal dezenvolvimentu sustentavel. Tanba Agrikultura sai fonte prinsipal ba sustenta familia kuaze 80%, no adultu 64% neebe servisu nudar agrikultor iha Timor-Leste,” dehan nia iha Salaun FONGTIL, Caicoli, Dili, Tersa (01/12/2020).

Maibe nia dehan area agrikultura ladun hetan atensaun sufisiente desde tempu naruk no alokasaun orsamentu mak la iha nia aumentu husi tinan ba tinan, nee refleta iha OJE 2021, husi biliaun $1,895 alokasaun ba agrikultura mak 2.1% deit, maski Governu friza iha Planu Rekuperasaun Ekonomika tinan 2020 katak, agrikultura ida forte sei sai xave ba hadiak seguransa aihan no proteje ekonomia husi krize iha futuru.

Aliende nee iha OJE 2021 Governu aloka 11% atu konstroe no rehabilita estrada rural sira maski nunee Governu ladun identifika no prioritiza estrada rural sira mak liga ho area produsaun agrikultura no asesu ba merkadu.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here