PD Propoin Rihun $50 Halo Akizisaun Ba Fini Hortikultura

Mariano Assanami Sabino. (Dok: STL)

DILI, STLNEWS.co – Bankada Partidu Demokratiku (PD) propoin $50,000.00 husi fundu rezerva hodi bele halo akizisaun ba fini hortikultura, atu nunee fasilita grupu arikultor sira iha proposta lei Orsamentu Jeral Estadu (OJE) tinan fiskal 2021.

“Ho nunee bankada Demokratiku propoin atu aumenta tan rihun $50,000.00 husi fundu rezerva hodih bele halo akizisaun ba fini ortikultura nian, atu bele fasilita grupu agrikultor sira,” refere proposta alterasaun neebe propoin husi deputadu Mariano Assanami Sabino, Antonio da Conceição no Adriano do Nascimento. iha PN, Sesta (04/12/2020).

Deputadu Mariano Assanami Sabino, argumenta se Timor-Leste ba soberania alimentar entaun, tenke hasae produsaun.

“Atu hasae produsaun ho produtividade tenke ho fini kualidade entaun, ita tenke halo intervensaun iha fini. Se ita la intervein iha fini entaun popusaun kuda saida mak nia haan,” esplika Prezidente Partidu Demokratiku nee.

Assanami fundamenta, atu hasae produsaun metodu kuda tenke muda, fini tenke kualidade no bee tenke garante nunee hasae fini ortikultura ho kualidade.

Assanami fiar proposta ho numeru 23 nee sei pasa iha plenaria, tanba reprezentante povu sira maioria koalia kona-ba soberania alimentar.

“Uluk, hau sei Ministru Agrikultura no Peska (MAP), hau mai sadik deputadu sira katak sei imi konsidera mehi neebe MAP nian tinan lima deit produsaun hotu ona, proudusaun rai-liur la-mai ona. Uluk hau sei lidera MAP produsaun batar nee konsege atinje tonelada rihun 140, hare too tonelada rihun 120, nee laos MAP nia data, maibe FAO mak fo sai, agora nein metade,” haktuir Assanami.

Bankada Demokratika nia justifikasaun sumariu neebe argumenta iha proposta alterasaun nee refleta ba politika VIII Governu neebe atu halo rekuperasaun ekonomiku. Tanba nee maka Diresaun Nasional Ortikultura presiza fasilita grupu argrikultor sira, liu-liu grupu sira neebe durante nee nia moris depende ba kuda modo hodi sustenta sira nia moris loron-loron nian, atu bele hasae produsaun modo hodi bele responde ba nesesidade merkadu no konsumidor sira.

Bankada Demokratiku mos propoin tratorista sira hamutuk nain 329 neebe servisu fila rai iha tempu bailoron hetan deit osan $5 dolar ka loron ba loron 80.

Ho situasaun neebe tratorista sira enfrenta, bankada Demokratiku propoin $131,600.00 hosi fundu kontijensia atu bele aumenta $5 kada ema ida (pesoa) atu-bele aguenta hodi halo operasionalizasaun trator durante loron 80 nia laran.

Nunee mos ba pesoal extensionista sira hamutuk nain-500 iha territoriu nasional presiza nee iha aumenta $450,000.00 nunee fasilita extensionista sira $25 dolar kada pesoal ba kada kategoria extensionista sira (senior, koordenador, postu no suku).

Reportajen: Domingas Soares
Editor: Ekipa STL

LEAVE A REPLY

Please enter your comment!
Please enter your name here