Perfurasaun Mina, Tenke Fo Servisu Ba Joven Suai

DILI, STLNEWS.co – Reprezentante povu iha uma fukun Parlamentu Nasional (PN), preokupa tebes ho traballador sira neebe servisu perfurasaun mina matan iha Suai nee tenke fo importansia liu ba Timor oan sira, liu liu povu Suai oan sira.

“Hau husu ba kompania Timor Reals ho ANPM atu fo prioridade ba joven sira iha Suai, laos servisu espesial sira, maibe hanesan kondutor, ema sira neebe haree uma nomos ajuda servisu sira seluk neebe Timor oan sira bele halo nee fo deit ba, labele lori ema mai husi rai liur, tanba joven sira iha Suai presiza tebes atu servisu,” lamentasaun nee hatoo husi Deputadu Abel Pires liu husi sesaun Plenaria Segunda (18/10/2021) iha Parlamentu Nasional.

Nia katak, lolos nee servisu sira hanesan enjeneiru nee bele loke ba Timor oan sira neebe iha konesementu, maibe ba kondutor sira no ema neebe atu kahur masa nee la presiza loke ba ema seluk, fo oportunidade ida nee ba Suai oan sira.

Iha fatin hanesan Deputada Elvina de Sousa mos hatutan, karik problema sira nee maka akontese duni iha projetu perfurasaun mina matan iha Suai mak husu ba parte relevante sira atu toma konsiderasaun, atu nunee projetu nee lao bele kria duni kampu servisu ba povu Suai.

“Ami husu ba kompania rua neebe kaer projetu nee, atu kria kampu servisu ba joven sira iha Suai, labele mai lori fali ema husi nasional mak ba servisu iha projetu nee, karik sira tekniku sira mak lori husi nee ladun iha problema, maibe ajudante sira seluk nee Suai oan sira, no sira labele sai penonton ba obra neebe lao iha Covalima,” dehan nia. *

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here