PN Husu Fahe Fos Gratuita Ba Povu

(Foto: STL/Guilhermina Franco)

DILI, STLNEWS.co – Membru Parlamentu Nasional (PN) husu governu, atu fahe fos neebe tau hela iha armajen Centru Logistik Nasional (CLN) ba povu, tanba povu halerik ba aihan.

Deputadu José Virgilio hatete, serka sanitaria estende too loron 2 fulan Abril, ida nee lori tempu naruk, tanba nee husu ba governu foos neebe tau CLN, governu labele faan hodi hetan osan, maibe oinsa atu apoiu humanitariu ba povu, tanba 80% komunidade neebe hela iha Dili kuaze la servisu, sira nia moris depende ba rendimentu husi negosiu, maibe serka sanitaria halo atividade paradu no agora povu hahu halerik ba aihan.

“Ita hare serka sanitaria halo povu hahu halerik ba aihan, tanba nee fos governu nian neebe tau iha CLN labele faan hodi hetan osan, maibe buka atu apoiu humanitariu ba povu sira neebe presiza aihan, tanba serka sanitaria halo povu nia atividade la lao, no povu iha kapital Dili kuaze 80% la servisu, sira nia moris depende ba vida negosiu,” dehan deputadu Virgilio.

Nia afirma fos governu nian neebe tau iha armajen CLN nee, labele faan ba povu maibe ho situasaun Covid-19 nee, fos nee bele fahe gratuita, tanba governu faan iha situasaun agora maka povu atu hetan osan husi neebe hodi sosa fos neebe governu faan.

Tuir nia katak, fos neebe rai iha armajen governu nian nee, rega aimoruk hela deit, karik faan ba povu maka sira han oinsa sira nia saude, lolos nee fos sira nee fahe ba povu han, laos lori ba rai kleur fali iha armajen, hodi rega aimoruk hela deit.

Nunee mos Prezidente Centru Logistik Nasional, Augosto Junior hatutan, fos neebe maka governu tau iha armajen nee, atu antesipa karik setor privadu sira ka kompania importador sira halimar folin fos iha merkadu maka Centru Logistik Nasional iha dever atu tun ba halo intervensaun, ka faan fos sira nee ho folin baratu.*

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here