PN Husu Governu Implementa Pakote Rekuperasaun Ekonomika

Membru Parlamentu Nasional (PN) husu governu da-8, atu implementa pakote rekuperasaun ekonomia, nunee bele hadia ekonomia iha rai laran. (Foto: STL/Alberto Menezes)

DILI, STLNEWS.co – Membru Parlamentu Nasional (PN) husu governu da-8, atu implementa pakote rekuperasaun ekonomia, nunee bele hadia ekonomia iha rai laran.

Tuir Deputadu Bankada Demokratiku (PD), Adriano do Nascimento, husu ba governu avansa ho medida politika pakote rekuperasaun ekonamika iha rai laran.

“Governu toma tiha inisitiva hamosu pakote rekuperasaun ekonomika, tanba nee sujere atu implementa daudaun ona pakote rekuperasaun ekonomika nee. Buat ruma seidauk loos ita aprende depois maka hadia, nee kestaun estadu laos kestaun governu ka parlamentu nian,” dehan nia liu husi plenaria iha PN, Sesta (02/10/2020).

Nunee mos, iha jeneralidade loron daruak debate proposta Orsamentu Jeral Estdu (OJE) tina 2020, iha loron ohin.
Alende nee, Prezidente Komisaun C (Finansa Publika), Deputada Maria Angelica Rangel, reforsa Governu nia politika iha livru 1 (panorama orsamental) maka rekuperasaun ekonomika.

“Medida politika ba rekuperasaun ekonomika sei tau osan tokon $113 ba rekuperasaun ekonomika hodi rekupera fali ita-nia situasaun ekonomia iha rai laran,” dehan Deputada Bankada FRETILIN nee.

Prezidente Komisaun C fundamenta, osan tokon $113 ba pakote rekuperasaun ekonomika nee husi total despeza billiaun $1.497,1 iha tinan fiskal 2020 nian.

Nia tenik, maibe relatoriu no pareser Komisaun C nian iha loron kinta nee, rekomenda atu pakote rekuperasaun ekonomika nee tenke preve iha Fundu Covid-19.

Nia hatutan, laos aloka ba Ministeriu Koordenador ba Asuntu Ekonomika (MKAE). Verba nee sei transfere ba Fundu Covid-19 liu husi rubrika transferensia publika no resta liu husi bens (sasan) no servisu.

Reportajen: Domingas Soares
Editor: Ekipa STL

LEAVE A REPLY

Please enter your comment!
Please enter your name here