Politika SEKoop Kontinua Dudu Kooperativa Hakdasak

Sekretariu Estadu Kooperativa, Elizario Ferreira. (Foto: SEKoop)

DILI, STLNEWS.co – Politika Sekretariu Estadu Kooperativa (SEKoop) nian ba tinan 2021 maka, nafatin dudu kooperativa sira neebe maka durante nee lao, maibe sei hakdasak hela.

“Ami estabelese ona kooperativa iha Postu Administrativu 37 no kooperativa mos 37, tanba nee politika SEKoop nian nian ba oin atu dudu nafatin kooperativa sira nee sai diak, no sira neebe maka durante nee lao sei hakdasak hela maka, ita nafatin tau matan hodi dudu sira lao ba oin,” kestaun nee fo sai husi Sekretariu Estadu Kooperativa, Elizario Ferreira ba jornalista iha salaun Katedra, Tersa (29/12/2020).

Nia mos afirma liu tan katak, kooperativa sira neebe maka iha ona nee SEKoop sei tau matan, atu nunee sira bele hadia diak liu tan, hodi sira bele funsiona ho diak hanesan instituisaun no asegura sira nia estabilidade ekonomia.

“Ami sei halo akompaniamentu ba kooperativa sira neebe maka lao kleur ona, maibe sei hakdasak hela, oinsa sira bele buras fali hodi kontribui ba ekonomia nasional, no kooperativa sira neebe maka hamrik rasik maka, governu prontu atu kria formasaun ba sira atu nunee sira bele halo jestaun ba sira nia finanseiru neebe sira iha, tanba nee formasaun ba membru kooperativa sai hanesan xave importante ba membru sira,” dehan Sekretariu Estadu Kooperativa, Elizario Ferreira.

Iha fatin hanesan membru kooperativa, Maria Alves, hatutan, durante nee governu fasilita deit formasaun ba kooperativa sira, governu la tau osan iha kooperativa hodi fasilita kreditu ba membru sira.

“Ami preokupa tanba kooperativa barak maka too agora sai hakdasak, problema nee akontese, tanba dala ruma finanseiru laiha, dala ruma formasaun ba ami membru sira ladun masimu, tanba nee maka halo kooperativa balun avansa ba oin, no balun hakdasak deit iha fatin, tan nee liu husi OJE 2021, ami husu ba SEKoop atu tau matan ba kooperativa hotu, labele hare deit sira neebe avansa ona ba oin nee,” dehan membru kooperativa nee.*

Reportajen: Madalena Horta/Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here