DILI, STLNEWS.co – Povu iha Munisipiu Ermera preokupa presu kafe iha merkadu rai laran nomos iha rai liur, tanba nee husu ba Parlamentu Nasional (PN) atu kria lei ruma konaba presu justu.
“Ami husu ba PN atu kria lei ruma hodi regula presu kafe, tanba iha merkadu rai laran folin kafe tun, maibe merkadu rai liur presu aas.
Benefisu liu ba kompanhia sira neebe sosa hodi halo esportasaun ba rai liur,” kestaun nee fo sai husi Koordenador Agrikultor iha Munisipiu Ermera, Mateus da Costa ba STL liu husi telefone, Tersa (04/07/2023).
Nia afirma, atu regula presu justu mak parlamentu tenki kria lei ida, no governu sai hanesan ajente atu bele toma responsabilidade, oinsa bele kompras direitamente, atu nunee bele fo mos taxa ba estadu, aleinde nee tenki kria sentru industria Kafe iha Munisipiu Ermera, atu nunee bele kria mos kampu servisu ba joven Ermera oan sira.
Iha parte seluk, reprezentante povu iha uma fukun Parlamentu Nasional, Deputadu Antonio da Conceicao hateten, los duni povu iha Leorema mos preokupa konaba presu kafe.
“Kompanhia sira ba tetu ho folin neebe kiik, maibe lori ba rai liur presu diak tebes, tanba nee ita tenki halo balansu, ho nunee agrikultor sira mos bele hetan netik rendimentu diak, tanba bainhira presu diak mak motiva tebes povu atu badinas kuda,” dehan nia.
Nunee mos Ministru Agrikultura no Peska (MAP), Marcus da Crus hateten, planu prioridade 100 dias, nia sei fo importansia ba plantasaun kafe, ho nunee bele hasae produsaun kafe iha rai laran, se lae mak kada tinan kuantidade importasaun sei kontinua tun, tan nee politika governu sei hasae produsaun kafe.
(mad)
