Povu Nafatin Infrenta Bee Mos

(Foto: Espesial)

DILI, STLNEWS.co – Problema bee mos nafatin sai preokupasaun komunidade sira neebe hela iha area Tasi-Tolu, liu-liu bairru foun, tanba kada loron komunidade tenke lori jargen ba buka bee mos, dala ruma sosa deit husi kareta tangki neebe faan bee, kada jargen ho presu 10 centavos.

Ba STL, Sabadu (03/04/2021), Lucia da Costa hanesan komunidade hateten, atu tempu udan ka bailoron, komunidade iha bairru foun ida nee mai konsentra hamutuk iha be matan ida deit, hodi kuru be mos ba konsumu, no bee mos mai tuir oras, dala ruma la too oras ida.

Serake komunidade iha bairru foun ida nee barak tebes, tan nee dala ruma balun hetan be no balun la hetan, problema tanba be mai la too oras, tan nee obriga komunidade sira hasai rasik sira nia osan hodi sosa be.

“Ami sosa bebeik ona bee mos husi kareta tangki sira, neebe faan be tama sai bairru, problema tanba bee PAM mai tuir oras deit, tan nee dala ruma komunidade balun hetan no dala ruma la kuru tanba bee maran, nia mai tuir oras, maluk balun sosa deit husi tangki bee mos nian, kada jargen 5 liter ho presu 10 cent,” dehan komunidade nee.

Nia mos afirma liu tan katak bee mos neebe dada tama mai iha bairru ida nee, tanba komunidade tau hamutuk osan mak dada bee husi estrada boot tama mai bairru foun, maibe bee mos mai tuir oras deit, tan nee balun kuru i dala ruma balun la kuru.

Iha parte seluk reprezentante povu iha uma fukun Parlamentu nasional, Deputadu Antonio da Conceição hatutan, problema bee mos, estrada, no eletrisidade too agora sei sai nafatin preokupasaun boot ba povu, tanba nee liu husi orsamentu neebe iha, oinsa governu bele buka solusaun ba preokupasaun povu nian.*

Reportajen: Madalena Horta
Editor: Josefa Parada

LEAVE A REPLY

Please enter your comment!
Please enter your name here