PR Apelu Sidadaun Hotu Ajuda Governu Atu Rekopera Ekonomia

Prezidente Republika Francisco Guterres Lú Olo. (Foto: Media PR)

LIQUICA, STLNEWS.co – Prezidente Republika Francisco Guterres Lú Olo apelu ba sidadaun hotu atu ajuda governu nunee bele rekopera ekonomia no hasae kresementu ekonomia.

Prezidente Republika Francisco Guterres Lú Olo hatoo kestaun nee liu husi nia diskursu bainhira komemora 28 Novembru ba dala 45 iha munisipiu Liquica, Sabado (28/11/2020).

“Prezidente Republika hakarak lansa apelu atu ita hotu fo liman ba malu, militante partidu ka lae, feto no mane, atu ita ajuda Governu rekupera lalais ekonomia no hasae kreximentu ekonomiku, no nunee ita prepara futuru ida diak liu ba ita-nia oan no beioan sira. Atu sira hetan duni futuru diak liu, Estadu Timor-Leste tenke aposta liutan iha sira-nia edukasaun no saude atu sira bele sai produtivu liutan.” hatete PR Lú Olo.

PR hatutan tenke investe liu tan no diak liu iha sektor produtivu ekonomia nasional nian. Rekuperasaun ekonomia nasional sei hahu iha tinan finanseiru foun no tenke muda mos hanoin, hahalok no serbisu atu bele konsege ekonomia ida reziliente liu, inkluziu liu no hatuur ho konesimentu.

Prezidente Republika husu liu-liu ba titulares orgauns soberania, lider polítiku sira, deputadus no militantes partidus nian atu labele lakon beibeik tempu haksesuk malu ho kestaun sira neebe la iha prioridade ka la iha interese nasional.

Prezidente Republika sauda VIII Governu tanba aprova medidas haat hodi hamenus prejuízu husi krize Covid-19 ba tinan finanseiru ida nee.

Governu aloka millaun atus rua, rua nulu ba fundu Covid-19 hodi apoia sidadaun hotu-hotu, traballador sira, empreza kiik no mediu no maluk sira neebe halao atividade informal maibe la tama iha Sistema Seguransa Sosial.

“Prezidente Republika hakarak mos saúda VIII Governu tanba aprova ona medidas rekuperasaun ekonomika no halao dadaun ona balun. Prezidente fiar katak medidas sira sei ajuda maioria povu maibe seidauk natoon atu rekupera ekonomia nasional. Ita prepara-an dadaun atu hasae kreximentu ekonomia iha tinan finanseiru tuir mai no sei prepara-an diak liu tan iha tempu tuir mai.” katak nia.

Aman nasaun nee hatutan Artigu 6 Konstituisaun Republika koalia kona-ba objetivu sanulu estadu nian. Objetivu ida mak defende no garante soberania nasional. Ida seluk mak tenke hakotu injustisa sosial iha sosiedade. Katak tenke halakon kiak no haburas ba beibeik bein-estar ba povu tomak.

“Maibe atu hetan estadu ninia objetivus tuir konstituisaun haruka, ita hotu tenke hanoin hamutuk, diskute no haksesuk idéias oinsa dezenvolve Timor-Leste, ba povu tomak. Timor-Leste pertense ba ema hotu no hotu-hotu tenke iha dever, direitu no oportunidade hanesan. Ita presiza komprende objetivus estadu nian no tau aas objetivu sira nee, aas liu ita-nia interese pesoal ka grupu ida nian.“ dehan nia.

Lú Olo hatutan Konstituisaun RDTL liu husi artigu 8 Relasoins Internasionais, pontu 1 rekonese direitu povus sira-nian ba auto-determinasaun no indepedensia. Artigu 10 koalia kona-ba solidariedade Timor-Leste ho povu hotu-hotu neebe luta ba libertasaun nasional.

“Tuir deklarasaun husi Uniaun Afrikana, Sahara Osidental mesak mak sei nafatin sai nuudar kolonia iha frika. Sira-nia luta libertasaun nasional hahu iha 1973, ita-nian iha 1974, sira presiza ita-nia apoiu diplomatiku. Iha loron espesial ohin, hau hakarak apela ba Governu atu ativu liután, liuhusi reprezentasaun Timor-Leste iha Nasoins Unidas, organizasaun internasional sira no iha país belun sira, atu referendu bele implementa duni iha Sahara Osidental. Ita presiza mos haforsa ita-nia apoiu ba Reprezentante Sarahui iha Timor-Leste atu nia bele halo liutan ninia knaar diplomatiku, liu-liu iha rai sira iha ita-nia rejiaun.” katak nia.

Nia hatutan Iha ambitu relasoins internasionais, konstituisaun hatete mos katak Timor-Leste mantein relasaun espesial amizade ho país vizinu no iha rejiaun. Bloku boot liu no forte, iha rejiaun mak ASEAN, harii ho país sanulu, inklui país vizinu, Indonezia. Nunee, importante tebes ba Timor-Leste halo esforsu liutan atu tama iha ASEAN, iha tempu badak.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here