PR Promulga Dekretu Lei Fo Insentivu Finanseiru Estraordinariu ba Suku Sira

Prezidente Republika, Francisco Guterres Lú Olo, promulga Dekretu-Lei aprova husi governu atu fo insentivu finanseiru estraodinariu ba suku sira. (Foto: Media PR)

DILI, STLNEWS.co – Prezidente Republika, Francisco Guterres Lú Olo, promulga Dekretu-Lei aprova husi governu atu fo insentivu finanseiru estraodinariu ba suku sira.

Liu husi komunikadu imprensa neebe mak STL asesu husi Media PR, Kuarta (16/12/2020) hatete insentivu finanseiru estraordinariu nee sei atribui ba xefes sukus, xefes aldeias, pesoal neebe fo apoiu ba administrasaun suku no kolaborador sira, nuudar rekonesimentu husi estadu ba servisu sira neebe ema sira tenke halo hodi ajuda governu implementa programa asistensia ba família sira iha ambitu Covid-19.

Programa rua nee mosu atu hamenus susar ba família sira hafoin moras Covid-19 sai ameasa ba mundu tomak no Timor-Leste tama iha Estadu Emerjensia atu hasees-an husi kalamidade publika nee.

Iha nível mundial, nasaun ida-idak tenke duni foti medidas prevensaun oioin atu prevene no kombate moras nee, neebe ikus mai lori impaktu boot ba ekonomia nasional no konsekuentemente hatodan kondisoins finanseiras no sosiais ba família ida-idak no populasaun en-jeral.

Iha fulan hirak ba kotuk nee, governu dezenvolve programa asistensia oin oin atu hamenus todan finanseiru ba família ida-idak liu husi “Subsídiu Uma Kain” neebe konkluídu tiha ona no programa “Cesta Básica” iha faze ezekusaun.

Papel xefe sukus no xefe aldeia iha traballu preparatoriu too ezekusaun programa hirak nee importante tebetebes. Sira-nia papel importante tebes iha rejistu no atualizasaun “ficha da família” neebe integra iha livro rejistu uma kain no livru administrasaun suku, rai dokumentus, distribuisaun osan, sasan no voucher, utilizasaun konta bankaria no mobilizasaun ema.

Subsídiu estraordinariu nee sei selu dala ida deit no sei transfere ba konta bankaria suku nian. Xefe suku ida-idak sei simu US$ 200, Xefe Aldeia US$ 100 no Pesoal Apoiu ba Administrasaun Suku sei simu mos US$ 100.

Valor kompensasaun ba kolaborador sira neebe fo apoiu ba Governu fahe “Sesta Básika” iha suku sira sei define liuhusi diploma ministerial husi Ministru Administrasaun Estatal.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here