PR Promulga Lei OJE 2020

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika, Francisco Guterres Lú Olo, ohin 19 Outubru 2020 uza nia kbiit konstitusional hodi promulga dekretu hosi Parlamentu Nasional N.° 23/V – Orsamentu Jeral Estadu 2020.

Prezidente Republika konklui katak dekretu Parlamentu Nasional tuir presupostu no rekezitus neebe iha konformidade ho dispozisoins aplikaveis konstituisaun republika no nia lei sira, no mos kondisoins politikas ba nesesidade, konveniensia no premensia, no nunee promulga ohin Lei Orsamentu Jeral Estadu ba tinan-2020.

Parlamentu Nasional aprova Orsamentu Jeral Estadu ba tinan-2020 ho valor global US$1.497,04 miloens. Dotasaun orsamentu fahe tuir klasifikasaun ekonomika tuirmai: US$ 207,3 miloens ba Salariu no Vensimentus, US$563,0 miloens ba Bens e Servisus, US$504,3 miloens ba Transferensias Publikas, US$9,2 miloens ba Kapitál Menor no US$213, 4 miloens ba Kapitál Dezenvolvimentu.

Osan neebe gasta tiha ona husi Janeiru 2020 too agora, liu husi rejime duodesimal, tama mos iha OJE 2020 neebe Prezidente Republika promulga ohin no Parlamentu Nasional haruka ona ba jornal republika.

Nunee, Orsamentu Orsamentu Jeral Estadu ba tinan-2020, ho montante total temi iha leten, refere ba despeza neebe halo tiha ona no sei halao too Dezembru 2020. Orsamentu nee inklui despezas ba estabilizasaun ekonomia husi efeitu negativu COVID-19 no husi udan no mota-sae iha sidade Dili, no sei kobre medidas ba rekuperasaun ekonomika, iha ambitu Planu Rekuperasaun Ekonomika, aprovadu husi VIII Governu Konstitusional, iha Agostu 2020.

Dekretu Parlamentu Nasional numeru 23/V, aprovadu husi Parlamentu Nasionál iha 8 outubru 2020 no Prezidente Repúblika simu, iha 9 Outubru 2020.

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here