Presu Fos Mantein; AIFAESA Husu Labele Liu 10%

Foto: Espesial

DILI, STLNEWS.co – Presu fos iha supermerkadu W-Four Audian, sei mantein no seidauk iha mudansa ba presu, maibe AIFAESA husu labele aumenta liu 10%.

Dehan Manajer Supermerkadu W-Four Audian, Leoniza C.Ximenes ba STL, iha nian knaar fatin Audian, Kinta (28/01/2021).

“Fos nian folin oras nee dadaun iha ami nian fatin, mantein nafatin ho folin iha semana kotuk, neebe 30 kg uluk $15 dolar, agora sae ba $17 dolar katak, seidauk iha mudansa entre semana kotuk no semana ida nee, maibe fos 25 kg uluk $13 dolar, agora sae ba $14 dolar, ho marka furak liu 25 kg, marka seluk 25 kg ho folin $13 dolar 50 cent,” dehan Leoniza.

Iha fatin seluk, Koordenador AIFAESA, Abilio Sereno hatete, folin bele aumenta, maibe labele manan liu lukru, labele liu 10 %, nee multa tuir dekretu lei nee hatete, purtantu atu dehan, bele aumenta presu, maibe parte AIFAESA hetan liu 10 %, nee labele.

“Ita tenke kompriende ita nian populasaun nee osan laiha, ita bele aumenta tan uituan deit mos sente aumenta makaas, tanba osan laiha, ami tenke halo tuir dekretu lei, dehan liu 10% ami rina ona balun aumenta, ami iha deit brigada nen, koloka iha Dili ba foho lae ona, hau husu ba konsumedor hotu, no benifisiariu hotu, kuandu akontese hanesan nee, mai fo hatene no labele tau deit, multa lao hela, ba ami selu ou la selu la preokupa buat ida, tanba la selu ami haruka ba Ministeriu Publiku, tinan nee tama iha seis mil, maibe tinan kotuk sesenta novi mil,” dehan Abilio.

Nia hatutan, kada loron AIFAESA nafatin halo inspeksaun ba presu sasan sira nee, tanba nee husu atu labele aumenta liu presu, tanba hasae liu presu sei hetan multa, tanba iha balun hahu hasae dadaun ona presu sasan ba konsumedor sira, ho ida nee diak presu nee halo normal deit, bele aumenta, maibe labele liu 10%.

Reportajen:Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here