Presu Kafe Depende Merkadu Inetrnasional

Presu kafe depende ba merkadu, tanba nee Cooperativa Cafe Timor (CCT), la manipula folin kafe iha merkadu rai laran, maibe presu bazeia ba folin merkadu internasional. (Foto: GSE)

DILI, STLNEWS.co – Presu kafe depende ba merkadu, tanba nee Cooperativa Cafe Timor (CCT), la manipula folin kafe iha merkadu rai laran, maibe presu bazeia ba folin merkadu internasional.

Tuir Manajer (CCT) Sisto M Piedade katak, kafe neebe CCT hola iha povu agrikultor hodi halo exportasaun ba rai liur, nia presu tuir duni presu merkadu international, tan nee iha merkadu internasional folin tun maka, CCT hola iha povu agrikultur mos folin tun, karik presu sae iha merkadu international, bele fo benefisiu ba agrikultor rai laran, tanba kafe folin sae.

“Hau hanoin tinan ida nee CCT sei halo exportasaun kafe ba rai liur kuaze dois mill dozentu toneladas ba rai liur liu-liu Australia, Amerika, Korea no Japaun no presu neebe maka CCT fo nee tuir presu merkadu, tanba governu mos hatene presu kafe iha merkadu rai liur,” kestaun nee fo sai husi Manajer CCT Sisto M Piedade ba STL iha Salaun Katedral Segunda (30/11/2020).

Nia mos afirma liu tan katak, karik povu agrikultur balun ladun satisfas ho presu kafe iha merkadu rai laran, maka la taka dalan ba sira atu faan ba kompania seluk, maibe atu dehan deit katak, durante nee CCT maka sempre hola agrikultur sira nia kafe, nomos produtu seluk hodi halo exportasaun ba merkadu rai liur.

Iha parte seluk Prezidente auturidade Munisipiu Ermera Jose Martinho dos Santos Soares hateten, durante nee kompania CCT maka fo moris ba povu agrikultur sira, tanba cct maka sosa agrikultur sira nia kafe, hodi halo exportasaun ba rai liur, maibe dala ruma tamba Covid tan nee influensia ba rendimentu povu kiik nian, dala ruma presu tun.*

Reportajen: Madalena Horta
Editora: Carme Ximenes

LEAVE A REPLY

Please enter your comment!
Please enter your name here