Produtu Lokal Iha Merkadu Taibesi Folin Baratu

DILI, STLNEWS.co – Area Merkadu Taibesi nakonu ho vendedor produtu lokal, komprador sira neebe sosa mesak ho folin baratu deit.

“Ami faan modo iha merkadu Taibesi kontenti, tanba sasan sira neebe ami mai faan iha merkadu sai folin, nunee ami faan ho presu neebe normal ba ema neebe atu mai sosa produtu sira neebe ami faan,” dehan Negosiante Abrão Pereira Ba STL iha merkadu Taibesi, Domingu (26/11/2023).

Negosiante Abrão Pereira hatete, politika setor agrikultura neebe funsiona tebes nee laos husi teoria deit, maibe pratika duni, ba iha fatin natar sira no toos sira, ohin loron hatudu produtu lokal sira, hanesan modo tahan, kanku, tomate no seluk tan, neebe mak faan iha merkadu sira, liu-liu merkadu Taibesi nian.

“Ami nia produtu kompara ho tempu uluk diferente tebes, tanba uluk dala ruma faan too dodok, maibe ohin loron ho volume produtu lokal nian sae, entaun ami faan baratu deit, no folin neebe diak ba komprador sira atu mai sosa,” nia deklara.

Nia dehan, planu oin-oin mak Estadu TL dehan atu halo investimentu ba setor potensial sira, liu-liu agrikultor nian, nunee realidade hatudu duni katak produtu neebe ita kuda, ohin ita kuu, hodi mai faan iha ita nia merkadu sira.

Produtu lokal sira neebe faan iha merkadu, laos kuda iha Dili laran, maibe mai husi munisipiu sira hotu, liuliu 13 munisipiu inklui RAEOA nian, maibe produtu hanesnan modo, no sira seluk, barak liu mai husi Aileu, Maubesi, signifika mai husi area remota sira mak mai faan iha merkadu sira, orgulhu tanba modo sira bele sai folin diak.

Iha parte seluk, Helena Amrozu, nudar negosiante modo, iha merkadu Taibesi dehan, agradese ba merkadu neebe governu halo baa mi negosiante sira, mesmu ho fatin neebe klot, maibe bele suporta, oinsa faan ami nia produtu lokal sira, hanesan modo sira.

“Modo neebe ami faan iha Merkadu Taibessi, folin baratu deit, ho modo neebe kualidade diak, tanba ita nia produtu raik, entaun husu ba Timor oan hothotu, konsumu ita nia produtu diak liu, duke produtu importasaun,” nia sublina.

Nia afirma, husi pontu prinsipal neebe iha, katak, dependensia ba produtu lokal diak liu duke ema nia produtu, signifika atu potensializa setor agrikultura, nunee bele aumenta nia rekursu krusial sira, hanesan produtu lokal sira, atu sai diak.

“Nunee tempu neebe ita sente hamlaha, bele konsumu raik ita nia produtu, duke hein ema ni produtu neebe depende ba ema nia situasuan, tanba nee husu ba nain ulun sira, atu halo investimentu neebe sai diak liu tan iha ita nia area liuliu setor agrikultura ho diak,” nia hateten.

Entertantu Estudante UNPAZ, Departamentu Ekonomia Jestaun, Eurico da Conseicõa hateten, atu jere setor agrikultura, mak presiza investe no dezenvolve diak, nunee povu Timor oan bele hafolin liutan produtu agrikola mai iha merkadu sira.

“Ha’u haree produtu lokal hanesan, modo mutin, Kanku, ai-mans, liis, no modo sira seluk, iha Merkadu nasional sira, liuliu iha Taibessi folin neebe normal tebes no baratu tebes, entaun husu ba komunidade feto ka mane, diak liu konsumu ita nia produ, duke ema nia produtu,” nia deklara.

Hanesan akdemiku lamenta tebes, bainhira rona politika governu atu halo investimentu ba setor agrikultura nian, tanba uluk dehan povu kuda governu sosa, ikus filosofia nee sai namlaek, laiha folin, halo povu sai terus ho politika ida nee.

(EST 1)

LEAVE A REPLY

Please enter your comment!
Please enter your name here