DILI, STLNEWS.co – Projetu foun iha rai laran laiha, setor privadu labele asesu kreditu neebe governu tau ona osan iha banku, hodi fasilita setor privadu sira.
“Los duni ita nia governu tau ona osan iha banku atu fasilita setor privadu, maibe ami ba impresta atu lori mai halo saida, tanba projetu foun laiha, oinsa atu selu fila fali osan funan ba banku. Tan nee, ami setor privadu la barani impresta osan, tanba projetu foun ka setor publiku iha rai laran laiha,” kestaun nee fo sai husi Emprezariu Antigu, Oscar Lima ba STL iha nia knaar fatin Fomento, Kinta (23/03/2023).
Nia esplika, kreditu suabe neebe fasilita ba setor privadu sira nee diak, maibe dala ruma ninia kriteria mak difikulta setor privadu atu asesu ba kreditu, problema no razaun sira nee hatoo ona ba iha governu atu haree, tanba kriteria neebe governu fo todan tebes atu ema susar asesu ba kreditu.
Nia afirma, kreditu neebe governu fo nee diak tebes, tanba nia jurus kiik, tan nee fasilita tebes setor privadu atu asesu ba kreditu, maibe problema ida mak setor privadu sira ba kreditu atu uza ba halo saida.
Iha parte seluk, reprezentante povu iha uma fukun Parlamentu Nasional, Deputada Josefa Pereira hateten, governu tau ona osan iha banku atu fasilita setor privadu sira, maibe realidade too agora seidauk iha setor privadu ida hakbesik aan ba iha banku atu asesu ba kreditu.
“Hau hanoin setor privadu mak hanesan motor ba dezenvolvimentu rai laran, tanba nee sira iha dever tomak atu asesu ba kreditu, hodi halo netik buat ruma iha rai laran,” dehan Deputada FRETILIN nee.
(mad)
