Reklamante 600 Laiha Direitu Ba Subsidiu $200

Ministeriu Administrasaun Estatal (MAE), Miguel Pereira Carvalho. (Dok. STL)

DILI, STLNEWS.co – Rezultadu verifikasaun dadus reklamadus 1344 iha familia uma kain 600 laiha direitu ba subsidiu nee $200, tanba naran laiha lista suku sira.

Dehan Ministeriu Administrasaun Estatal (MAE), Miguel Pereira Carvalho ba Jornalista sira, iha Palasiu Governu, Dili, kuarta (25/11/2020).

“Lista 1344 nee besik 600 mak xefe suku xefe aldeia sira konfirma fali mai katak la rejistu iha sira nia suku laran, nunee labele selu, sei selu sira neebe mak elizivel ona no rejista ona iha suku iha loron 8 maiu 2020” dehan Ministru Miguel.

Ministru nee hatutan, dadaun nee iha ona prosesu nia laran Ministeriu Finasas sei tranfere osan suku sira, depois bele halo pagamentu iha fullan oin nia laran.

Maski nunee nia dehan parte MAE la nota iregularidade, maibe konfirma Xefe suku no aldeia sira atu ema sira neebe reklama nee realmente rejistu iha suku antes loron 8 fulan Maiu tinan 2020 kalae, loos duni maioria rejistu iha livru suku maibe iha balun hanesan 600 la rejistu sira dehan labele selu.

MSSI no MAE trata hela atu garantia ema sira neebe rejistu bele iha direitu ba osan refere.

Nia esplika dadus reklamasaun ba pagamentus sira, Ministeriu Solidariedade Social Inkluzaun (MSSI) haruka lista reklamantes 1.344 mai Ministeriu Administrasaun Estatal atu verifika fila fali, agora 2.884 mak agora halo hela pagamentu, tanba verifika ona haruka ona MSSI no haruka ona ba Konta suku nian no MAE rasik mak selu.

“Agora iha hela lista 1.344 maka MAE verifika hotu ona no hatama ona 12.000 ba MSSI no konkorda ona, atu bele haruka ba Ministeriu Finansas bele haruka osan ba suku sira atu ema sira bele hetan ona direitu,” nia esplika.

Nia hatutan, sira hatoo reklamasaun no verifika ona tun ba suku sira haruka fila fali mai no sira iha direitu duni nunee halo pagamentu ba sira lakleur tan bele halo ona tranferensia osan ba suku sira.

“Uniku munisipiu neebe seidauk simu konfirmasaun nee maka RAEOA no aldeia ida rua iha Aileu seluk konfirmadu hotu ona,” realsa Miguel.*

Reportajen: Domingas Soares
Editora: Carme Ximenes

LEAVE A REPLY

Please enter your comment!
Please enter your name here