Rekopera Ekonomia, Tenke Investe Iha Setor Infraestrutura

Prezidente CCI-TL, Oscar Lima. (Foto: STL/Madalena Horta)

DILI, STLNEWS.co – Atu rekopera ekonomia iha rai laran, hodi kria fali kampu servisu ba Timor oan sira mak governu tenke investe makaas iha setor infraestrutura bainhira Covid-19 nee livre ona husi TL, tanba setor infraestrutura mak bele fo servisu ba Timor oan barak.

Kestaun nee fo sai husi Prezidente Camara Comersiu Industria Timor Leste (CCI-TL) Oscar Lima ba STL liu husi telefone, Kinta (01/042021).

“Ita haree Covid-19 halo kompania barak mak hapara sira nia atividade, tanba nee fo impaktu ba traballador sira neebe servisu iha kompania. Ida nee bele halo numeru dezempregu aas iha TL, tan nee atu rekopera ekonomia iha rai laran, dalan neebe diak ba governu mak investe makaas iha setor infraestrutura, agrikultur, no turismu, ho nunee bele fo servisu ba Timor oan sira,” dehan Presidente CCI-TL nee.

Nia afirma liu tan, atu fo servisu ba Timor oan sira mak governu tenke brani dezenvolve setor sira neebe temi ona, tanba liu husi setor sira nee bele garante hodi fo servisu ba traballador, iha nasaun barak hasoru hela Covid-19 maibe ema nia ekonomia ladun monu, maibe iha TL ekonomia tun tebes, tanba antes nee TL hasoru impase politika, depois mai tan pandemia Covid-19, influensia ba ekonomia TL boot tebes. *

Reportajen: Madalena Horta
Editora: Domingas Gomes

LEAVE A REPLY

Please enter your comment!
Please enter your name here