Rekupera Ekonomia TL; Governu Tenke Koopera Ho Agrikultor

Ekonomista, João Mariano Saldanha. (Foto: STL)

DILI, STLNEWS.co – Atu rekupera ekonomia iha rai laran governu ho povu agrikultor tenke koopera hamutuk hodi hasae produsaun, liu liu rai neebe sei abandona, motiva sira atu kuda nunee bele hasae produtividade.

Dehan ekonomista, João Mariano Saldanha liu husi programa dada lia ho topiku “Dezafiu Estadu Iha Krize Ekonomia no Covid-19”, neebe halo iha STL, Segunda (08/02/2021).

“Hau hanoin ita tenke aumenta produsaun, tanba rai bokur barak maka too agora sei toba nonok hela, karik ita book ona rai sira nee maka, bele redus ona importasaun husi rai liur, bain hira ita hasae produsaun tonelada ida husi natar hektares ida ka rua maka situsaun ekonomia nee bele hahu rekupera,” dehan ekonomista João.

Nia afirma natar sira neebe sei toba barak nee, maka agrikultor sira servisu didiak, bele hasae produsaun husi 25 mil ba too 50 mil toneladas, maka setor ekonomia nee bele rekupera, ekonomia neebe monu iha tinan 2017 too 2020 nian.

Tanba tuir João katak, natar neebe sei ativa hela iha rai laran, kuaze 65 mil hektares, maibe produs deit 25 mil hektares, nee tanba dependesia TL nian makas ba produtu importasaun, no fos importasaun folin baratu duke fos lokal neebe nia folin karun uituan.

“Hau hanoin produsaun iha rai laran tun tanba, ita ladun fo importansia, oinsa atu hasae produsaun agrikula iha rai laran, tanba ita sei depende hela ba fos importasaun,” dehan ekonomista nee.

João Saldanha hatutan, governu tenke fo prioridade ba povu agrikultor, no prioridade laos atu fo osan, maibe prioridade atu fasilita povu agrikultor, sira lori produtu husi Suai mai Dili, transporte oinsa, no husi Viqueque atu lori sira nia produtu lokal ba faan iha Aileu mak sira nia transporte oinsa, karik estrada ladiak oinsa sira bele lori produtu nee too iha fatin neebe sira determina, tanba papel governu nian kria estrada neebe diak, problema kiik sira nee tenke buka atu hadia tutuir, ho nunee bele fasilita agrikultor sira asesu ba merkadu.*

Reportajen: Madalena Horta
Editora: Carme Ximenes

LEAVE A REPLY

Please enter your comment!
Please enter your name here