Rendementu Sasan Iha Bobonaro No Covalima Ameasa Boot Ba Komunidade

pontu vokal FONGTIL Munisipiu Bobonaro, Emerenciana Niko. (Foto: STL/Maria Tavares)

DILI, STLNEWS.co – Observasaun jeral pontu vokal Forum ONG Timor Leste (FONGTIL) iha terenu, hatudu katak komunidade Bobonaro no Covalima nia rendementu ameasa boot no menus iha tempu estadu emerjensia.

“Ami nia observasaun jeral ba komunidade sira konaba pandemia Covid-19 katak, komunidade nia rendementu ameasa boot no menus los iha tempo Lockdown, tanba sasan sesta bazika ou sembako.” tenik pontu vokal FONGTIL Munisipiu Bobonaro, Emerenciana Niko, ba jornalista sira liu husi video konfrensia iha Salaun FONGTIL, Caicoli-Dili, Kuarta (03/03/2021).

Nia hatete, folin sae iha loja no kios sira hanesan fos 20 kg uluk folin $11.50, maibe agora sae ba folin $13.50, no uluk modo futun haat 0.25 cent maibe agora futun rua 0.25 cent, mina Goreng litru 5 uluk $4.5 maibe agora sae ba $6.00.

Nia informa, sasan atu faan iha loja no kios sira menus ba bebeik no sira fo ba malu atu ense ba sira nia kios, loja no mos restaurante sira.

Aleinde nee, iha fatin servisu, fatin publiku no komunidade sira nia uma oin, hatudu katak balun tau bee no balun la tau bee fase liman ho sabaun, razaun husi parte komunidade sira la tau tanba ekonomia la subsiente, tanba tempu agora halo natar presiza osan, no oan ba eskola ou kursu iha Dili presiza osan mos.

Entretantu pontu vokal FONGTIL Munisipiu Covalima, Bendigo Amaral Barros, hatete impaktu husi estadu emerjensia sasan komesa menus ona, la iha sasan seluk atu sosa.

Nia informa uluk seidauk lockdown, iha merkadu Suai foos 25 Kg $13, maibe agora sae ba $14 ou $15. Depois iha Postu Administrativu Fatumeta, Maucatar, stok fos komesa hotu no folin komesa sae ba $17.50.*

Reportajen: Maria Tavares
Editor: Ekipa STL

LEAVE A REPLY

Please enter your comment!
Please enter your name here