Rendimentu $500 Simu Subsidiu, Redeposita Ba Kofre Estadu

HUSU - Ministeriu Solidariedade Sosial no Inkluzaun (MSSI), liu husi Diretor Jeral, Rui Manuel Gago Exposto, liu Konferensia Imprensa, iha nia knar fatin (MSSI) Caicoli Dili, husu ba Funsionariu Publiku neebe ho salariu (500) dollar, foin lalais simu Subsidiu umakain, atu fo fila osan neebe sira simu ona ba BNCTL, Kinta (17/12/2020). [Foto: Donaciano Magalhães]

DILI, STLNEWS.co – Ministeriu Solidaridade Sosial no Inkluzaun (MSSI), servisu hamutuk ho ho Ministeriu Administrasaun Estatal (MAE) no Banku Nasional Komersiu Timor Leste (BNCTL), konkorda buka mekanizmu ba benifisiariu neebe rendimentu $500, maibe simu subsidiu uma kain, atu bele Redeposita hikas ba Kofre Estadu.

Diretor Jeral Ministeriu Solidaridade Sosial no Inkluzaun, Rui Exposto hatete, MSSI hakarak hatoo informasaun bazeia ba enkontru iha dia 15 Dezembru neebe maka realiza iha gabinete MSSI nian, hamautuk ho Ministeriu Administrasaun Estatal (MAE) no mos ho Banku Nasional Komersiu Timor Leste (BNCTL) konkorda hamutuk ona.

Atu informa ba benifisiariu sira neebe iha fulan Junu iha implementasaun subsidiu ba uma kain neebe maka sira nia rendimentu boot liu $500, maibe sira kontinua simu liu ona subsidiu $200 karik, i sira hakarak atu redeposita fila fali osan nee husi banku BNCTL, MSSI MAE no BNCTL prepara ona mekanizmu oinsa atu redeposita hikas osan ba kofre estadu.

Nia mekanizmu maka ba direitamente iha banku BNCTL iha neebe deit tantu munisipiu mos bele, hodi ba prense formatu ida iha neebe Ministeriu Finansa prepara tiha ona.

“Ita presiza esklarese suku ida neebe ita boot sira simu osan nee, tau suku nee nia naran, iha suku neeba nee iha ona konta bankaria nebe maka Ministeriu Finansa prepara iha BNCTL nasional no sukursal sira, funsionariu BNCTL sei ajuda prense dokumnetus formulariu neebe maka ita boot sira atu redeposit fila fali osan subsidiu uma kain nee, depois sei redeposit ba iha kontas suku ida idak nian,” dehan Rui.

Rui hatutan, hotu tiha ida nee nia prazu hahu husi inisiu Janeiru to 31 Marsu ministeriu fo prazu fulan tolu, liu tiha husi fulan marsu maka ministeriu sei entrega tomak kompetensia nee ba instituisaun relevante sira halo auditoria ba benifisiariu sira neebe maka simu ona osan refere.

“Labele preokupa katak dehan hau simu tiha ona Baucau agora dadaun hau iha Dili bele redeposita ba banku BNCTL Dili nian, importanteee maka tenki esklarese momentu simu osan nee iha suku ida neebe, hodi prense suku nia naran iha formatu neebe prepara ona husi Ministeriu Finansa, atu nunee bele redeposita fila fali osan ba suku refere, hodi bele redeposita osan nee ba iha kofre estadu,” nia esplika.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here