ZUMALAI, STLNEWS.co – Negosiante sira hetan rendimentu liu husi faan produtu lokal, hanesan foos rai no batar.
Haktuir Negosiante Harekain, Munisipiu Kovalima, Martinha da Costa ba STL iha Zimalai, Segunda nee (06/11/2023).
“Kada loron ami faan produtu lokal hanesan batar no foos rai. Foos rai laos oin ida deit, lae, maibe iha foos rai mean, mutin no metan. Konaba rendimentu kada loron depende ba ema neebe mai sosa, tanba ema halo viajen ba mai mak sosa ami nian produtu sira nee. Foos rai nee lata ida ami faan US$ 1, batar 50 sentavus lata ida. Ami hetan rendimentu loron ida bele hetan too US$ 20 resin,” dehan nia.
Nia afirma, ema neebe halo viajen mak mai sosa sira nian produtu, dala ruma balun sosa tomak karon, balun sosa deit US$ 10 ou US$ 5, ema balun sosa foos rai metan no foos rai mean, tanba sira gosta halo sasoro.
Nunee mos Rosalino Nunes hanesan konsumidor hatete, sosa foos rai mean US$ 10 no foos rai metan US$ 10, tanba foos rai mean uza halo sasoro dader no foos rai metan nee bele kahur ho foos rai mutin.
“Ami uza foos rai mak tein sasoro ba hau nia oan sira, tanba ita sosa iha Dili nee ema uza lata kiik, maibe ita haree iha nee uza lata boot, nee duni sosa barak kedas para ita bele uza kleur oituan, ema balun mai sosa batar, maibe ema gosta sosa liu foos rai, batar nee ema ladun sosa,” tenik nia.
Tuir observasaun STL iha terenu katak, foos rai neebe faan iha dalan ninin, ema hein kuaze nain rua ka tolu, no sira nain tur hein deit para konsumidor sira neebe viajen ba mai sosa sira nian produtu.
(jac)
