Ro Ba Oecusse Tenke Autoriza Husi SIJK

DILI, STLNEWS.co – Atu fasilita aihan ba komunidade sira neebe hela iha Oecusse ho Atauro, ro neebe mak tula sasan sira tenke hetan autorizasaun uluk husi Sentru Integradu Jestaun Krize (SIJK), mak ro foin lori sasan ba.

Tuir Prezidente APORTIL, Flavio Cardoso katak, tuir desizaun serka sanitaria katak, laiha movimentu atu tama sai, tanba nee bainhira husi Dili atu transporte sasan ba iha Oecusse ho Atauro, ro neebe mak atu tula sasan nee tenke hetan autorizasaun husi Sentru Integradu Jestaun Krize (SIJK).

“Foin dadauk ro Success lori nesesidade bazika ba Oecusse, maibe hetan duni autorizasaun husi Sentru Integradu no mai iha APORTIL mak APORTIL organiza ro nee hodi lori sasan ba, no despaisu husi Prezidente Centru logistik nasional (CLN), katak atu distribui fos ba iha Atauro, tan nee ami sei haree atu organiza ro saida mak bele tula ba,” dehan Prezidente APORTIL, Flavio Cardoso ba STL, Kuarta (31/03/2021) iha nia knaar fatin Portu Dili.

Nia mos afirma liu tan katak, maske Nakroma seidauk bele halo operasaun, maibe sei iha ro balun neebe sei bele atu ajuda hodi tula sasan sira nee ba rai ketan refere, agora iha ro Success, Atauro Express no ro sira seluk neebe bele ajuda atu lori sasan ba Atauro ho Oecusse.

Tuir nia katak, atu ema ka ou ro ba Oecusse ho Atauro bele, maibe portu laiha kompetensia, tanba desizaun hotu tenke bazeia ba parte saude liu liu Sentru Integradu Jestaun Krize (SIJK), depois mai iha Portu Dili hodi organiza tuir rekursu neebe portu iha.

Iha fatin hanesan Alexandrino Ximenes hanesan traballador portu hatutan, uluk kapital Dili seidauk establese serka sanitaria, ro atu ba Atauro ho Oecusse sei lao tuir orariu neebe fiksu tiha, maibe hafoin Dili establese serka sanitaria, mak ro atu ba Atauro ho Oecusse tenke hetan autorizasaun husi Sentru Integradu Jestaun Krize (SIJK).*

Reportajen: Madalena Horta/Jacinta Seqeuira
Editor: Ekipa STL

LEAVE A REPLY

Please enter your comment!
Please enter your name here