Ro Tula Sasan Importasaun Atraka Portu

Ro haat (4) neebe tula sasan importasaun husi Surabaya (Indonezia) atraka iha portu Dili. (Foto: STL/Jacinta Sequeira)

DILI, STLNEWS.co – Ro haat (4) neebe tula sasan importasaun husi Surabaya (Indonezia) atraka iha portu Dili.

Prezidente APORTIL, Flavio Cardoso Neves hatete, hahu inisiu fulan Janeiru tinan 2021 nee ro haat foin atraka ona iha portu Dili. Ro haat nee lori sasan nesesidade baziku, kareta no seluk tan.

“Ro hat neebe agora atraka iha portu nee lori sasan kahur malu, hanesan fos, mina, supermi, dala ruma kareta no motor, nee ita la hatene, tanba kontainer 20 fit no 40 fit mos iha, neebe sasan iha laran nee oi-oin deit,” dehan Prezidente APORTIL, Flavio ba STL, iha portu Dili, Kinta (14/01/2021).

Nia hatutan, ro hat nee mai husi Surabaya (Indonezia). Durante nee TL simu ro husi nasaun Singapura, maibe primeiru sistema lockdown, entaun ninia aturan nee fiksu, liu-liu ro neebe atu tama iha portu Dili, nee sira nia kuru sira labele tun, tanba TL nia ekipa neebe preparadu hanesan saude.

“Ita atu proteje ita nian ema sira neebe mak halo movimentu iha portu mos labele kona Covid-19, tantu hanoin iha nee saude mos iha ninia ekipa neebe mak kompletu, ita nafatin halo koordenasaun ho sira, atu bele tuir regras neebe mak aplika iha EE. Hau hanoin atividades iha portu desde inisiu mosu Covid-19 too agora, atividades iha portu Dili lao hanesan bai-bain deit,” nia dehan.

Iha parte seluk Duarte dos Santos, hanesan loja nain Jamdi, husi Munisipiu Covalima hatete, fos sira iha Munisipiu mos sae, tanba nee husi ba kompania importador hirak neebe durante importa sasan importasaun, sira tenke importa nafatin nesesidade baziku, atu nunee bele garante populasaun sira iha situasaun pandemia Covid-19 nian laran.

“Ita nian kompania importador sira mak tenke nafatin importa sasan sira nee, liu-liu nesesidade baziku hanesan fos, nee importante tebes, para bele responde ita nian populasaun iha rai ida nee, sekarik folin fos sae, nee dala ruma iha armajen balun fos laiha ona,” katak nia.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here