Rui Gomes Preokupa TL Sei Hasoru Dezafiu Boot

Ministru Finansa, Rui A. Gomes. (Foto: STL)

DILI, STLNEWS.co – Atual Ministru Finansa Rui Gomes sente kontente simu knaar neebe mak nia simu husi Prezidente Republika (PR) Francisco Guterres Lú Olo, maibe nia mos preokupa uitoan Timor Leste sei hasoru dezafiu boot oinsa garantia estabilidade ekonomia.

Ministru Finansa Rui A. Gomes hatoo kestaun nee ba jornalista bainhira remata simu tomada de posse husi Prezidente Republika Francisco Guterres Lú Olo iha Palasiu Prezidente Bairru Pite, Segunda lokraik (23/11/2020).

“Hau nia sentimentu kontente maibe hau preokupa uituan ita sei hasoru dezafiu boot halo nusa maka ita garantia estabilidade ekonomia sosial pais ida nee nian halo nusa maka ita bele garantia,” dehan MF Rui Gomes.

Ministru Finansas nee konserteza tenke hanoin konaba empregu, tenke hanoin konaba empreza. Ajente ekonomia sira ajuda sira nia likides no sira nia investimentu parte sosial oinsa maka bele garante familia sira nia rendimentu labele monu, oinsa maka bele investe iha parte rigor nee atu bele kuidadu osan rigor laiha responsabilizasaun entaun labele koalia kona-ba prioridade finanseira tantu aspeitu ida nee nia sei foka.

“Hau nia esperansa ita iha neeba ema barak kapasidade situasaun agora nee laos situasaun neebe uluk ita haree hosi planu estratejiku no planu oitavu governu ema la espera Covid-19 tama iha nee entaun situasaun nee la hanesan ona, ita tenke halo intervensaun neebe pontual atu ajuda ekonomia nee tama fila fali iha nia dalan ba.“ hatete nia.

Nia hatutan ida nee maka nia knaar tanba nee mak nia sei ba iha neeba sei halo reuniaun barak ho Vise Ministru, Diretor Jeral sira, Diretor sira depois haree iha neeba.

Rui Gomes mos iha esperiensia profisionál tinan 20 ba leten, Rui A. Gomes hanesan ekonomista interdixiplinar ida neebe espesializa iha area dezenvolvimentu.

Nia hatudu interese boot liu liu ba estudu konaba area estrutural sira kiak nian no oinsa kreximentu ekonomiku, mudansa estrutural no distribuisaun rendimentu relasiona ba malu. Ninia atividade peskiza foka liu ba Timor-Leste.

Nia hakerek ona dokumentu akademiku no polítiku lubuk ida (balun seidauk fo-sai) no halo aprezentasaun oioin konaba makroekonomia no ninia variavel sira, empregu, kiak, inflasaun, polítika fiskal no objetivu sira dezenvolvimentu mileniu nian.

Nia serbisu hanesan asesor ba S.E. Prrzidente Republika Timor-Leste, Jeneral Taur Matan Ruak, no mos hanesan Xefe Casa Civil Prezidensia Republika ninian hosi loron 1 fulan-Janeiru 2014 too loron 20 fulan-Maiu 2017. Iha fulan-Setembru tinan 2017 nia hetan nomeasaun nuudar Ministru Planu no Finansas iha VII Governu Konstitusional no kaer knaar nee durante fulan sia. Iha fulan Jullu 2018, Rui Gomes sai hanesan asesor ba S.E. Prezidente Republika, Dr. Francisco Guterres Lu Olo, ba asuntu ekonomia.

Nunee mos Primeiru Ministru Taur Matan Ruak liu husi diskursu hatutan Rui Gomes iha esperiensia neebe boot no dezempenu diak iha funsaun publika no ezekutiva neebe ohin toma pose.

“Hau nia pontu devista katak, Rui Gomes mak ema neebe merese duni lidera Ministeriu Finansas too governu nia mandatu remata,” dehan PM Taur.

PM Taur mos haktuir katak, MF sesante Fernando Hanjam la konsege kontinua, tanba kondisaun saude neebe la permite. Nunee iha loron 5 Novembru MF sesante Fernando Hanjam hatoo nia karta demisaun ba PM Taur Matan Ruak hodi husik atu demite nia husi kargu MF nian.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here