Sasan Menus Tama Portu

Prezidente Konsellu Administrasaun Portu Dili (APORTIL), Flavio Cardoso Neves. (Dok. STL)

DILI, STLNEWS.co – Durante situasaun pandemia Covid-19, sasan neebe tama iha portu Dili menus kompara ho tinan uluk.

Prezidente Konsellu Administrasaun Portu Dili (APORTIL), Flavio Cardoso Neves hatete durante iha situasaun Covid-19 nian laran, sasan neebe mak domina tama iha portu Dili, nee barak liu sasan nesesidade baziku, hanesan fos, mina, bee no sasan sira seluk tan, maibe sasan sira nee kuaze mai husi nasaun Indonezia, balun mai husi nasaun Singapura, inklui nasaun Australia rasik.

“Hau hanoin portu Dili desde hahu inisiu implementa Estadu Emerjensia nee, hau hanoin portu nian atividades lao normal, maibe aplika EE primeiru nee mak ita halo koordenasaun, liu loron rua tolu ita konsege haree ona no ita kompriende didiak saida mak dekereta iha EE nia laran, neebe desde inisiu primeiru too agora,” dehan Prezidente APORTIL Flavio ba STL, iha nia knar fatin Portu, Dili, Kuarta (25/11/2020).

Nia hatutan roo neebe mak mai barak lori sasan importasaun husi liur, nee barak liu mai husi Indonezia, maibe foin dadaun roo ida lori fos mai iha TL, nee mai husi nasaun Vietnam, sasan neebe mak roo sira tula, nee barak liu sasan nesesidade baziku, neebe mak bele resposta povu sira nian nesesidade lor-loron nian, tanba nesesidade baziku nee tenke tama bebeik.

“Hau hanoin sasan sira neebe durante tama nee, liu-liu kompania sira neebe mak halo negosiu, sira sempre hatama nafatin sasan hanesan sabaun, bee aqua, maibe ita haree katak, iha situasaun Covid-19 nian laran kareta mos tama, maski ninia numeru nee la barak, hanesan ho nesesidade seluk neebe mak importa husi liur mai ita nian rai, tanba hau haree kareta no motor sei tama nafatin, kuantidade nee la menus, maibe normal hela deit,” nia dehan.

Nia sublina, maske sasan sira nee tama iha portu Dili, maibe oinsa mak atu bele prevene aan nafatin husi moras covid-19, liu-liu halo kontrolu diak ba roo neebe tula sasan mai iha portu Dili, depois ema nain hira mak iha roo nee nian laran, tanba la hatebe los bainhira mak Covid-19 nee bele lakon iha mundu nee.

Reportajen: Jacinta Sequeira
Editora: Ekipa STL

LEAVE A REPLY

Please enter your comment!
Please enter your name here