SEAK Apoiu Komunidade Harii Uma Lulik

Sekretariu Estadu Arte no Kultura (SEAK) Teofilo Caldas. (Foto: STL/Alberto Menezes)

DILI, STLNEWS.co – Sekretariu Estadu Arte no Kultura (SEAK) Teofilo Caldas informa, SEAK preve ona orsamentu ba OJE 2021, $200.000 hodi apoiu komunidade harii uma lulik.

Iha OJE 2019, SEAK apoiu orsamentu ba komunidade hodi harii uma lulik hamutuk 40 resin. Maibe iha tinan 2020, SEAK labele fo apoiu tanba governu lao deit ho dotasaun orsamentu temporariu. SEAK simu proposta barak husi komunidade maibe labele fo apoiu.

Tama iha OJE 2021, SEAK preve ona osan $200.000 hodi fo apoiu ba komunidade neebe hakarak harii ou halo rehabilitasaun ba sira nia uma lulik. Nunee afirma SEAK Teofilo Caldas bainhira remata enkontru ho PM Taur Matan Ruak iha Palasiu do Governu, Kinta (22/10/2020).

Nia hatete, kriteria no rekezitus atu hetan apoiu orsamentu husi SEAK, primeiru konstrusaun uma lulik tenke halo ho material tradisional. Segundu, progresu kontruksaun uma lulik atinzi ona pursentu hira.

Kontribuisaun governu ba uma lulik neebe halo tuir komunidade sira nia vontade, konstrusaun atinzi ona pursentu 20 ou 50. Depois SEAK, apoiu uit oan hodi halo kman deit servisu. Laos SEAK mak harii fali uma ba komunidade.

Konaba uma lulik, governu iha dever moral tenki apoiu tanba uma lulik konsidera nuudar primeiru sentru kultural hodi halibur jerasaun ba jerasaun. Segundu, uma lulik nuudar muzeum tradisional ida hodi konserva kultural neebe beiala sira husik hela.

Terseiru, uma lulik mos nuudar fatin turizmu kultural neebe bele atrai turista hodi vizita. Kuandu turista sira ba vizita uma lulik, sei hasae rendimentu ba estadu. I sira ba sosa produtu lokal neebe familia prepara hela.

Konaba apoiu nee, SEAK hatoo ona proposta. Konaba konstrusaun uma lulik, SEAK iha ekipa ida hodi halo verifikasaun, antes atu fo apoiu.
Iha sorumutu ho PM Taur Matan Ruak, SEAK Teofilo Caldas hetan xamada husi Gabineti PM Taur Matan Ruak hodi relata servisu neebe dadaun halao.

Iha biban enkontru nee, sira koalia konaba biblioteka, jardin kultural, muzeum nasional no oinsa apoiu komunidade hodi rekopera sira nia ekonomia. Depois koalia mos preparasaun OJE 2021.

Kontribuisaun SEAK ba rekoperasaun ekonomia mak biblioteka, sentru kultural, muzeum no dezenvolve turizmu kultural, no istoriku sira hanesan eis Prizaun Aipelu, eis Rezidensia Administrador sira, no dezenvolve patrimoniu artitoniku origem Portugues nian. Fatin hirak nee istoriku, bele atrai turista ba vizita.

Aleinde nee, SEAK mos kontribui hela ba festival kultura neebe organiza husi Gabineti Prezidente da Republika, depois kontribui no kolabora ba komemorasaun 28 Novembru neebe halo hela preparasaun iha Liquica.

Editor: Ekipa STL
Reportajen: Alberto Menezes

LEAVE A REPLY

Please enter your comment!
Please enter your name here