Serka Sanitaria: Leonardo Defisil Sustenta Moris

Komunidade Leandro Barboza ho nia kaben moris hanesan peskador iha Tibar, defisil atu sustenta sira nia moris, tanba bok aan ladiak iha situasaun serka sanitaria. (Foto: Espesial)

TIBAR, STLNEWS.co – Komunidade Leandro Barboza ho nia kaben moris hanesan peskador iha Tibar, defisil atu sustenta sira nia moris, tanba bok aan ladiak iha situasaun serka sanitaria.

“Hau husu ba estadu se karik ita boot sira taka dalan, depois ami hanesan peskador ami la tama tasi, oinsa ami atu sustenta ami nia moris,” tenik peskador Leandro ba STL iha Tibar, Kinta (11/03/2021).

Nia husu ba seguransa sira, sekarik povu kiik lao hanesan ba sosa aihan hanesan fos, bele loke netik dalan ba sira. Labele deskute malu, see diskute malu orsida sira mos tauk la ba sosa, tanba lia fuan ida tan mak husi nee ba Dili la fila, se karik la fila Tibar, nee oinsa ho sira nia oan nia moris.

“Ami nia moris durante depende ba tasi, laiha tan buat seluk. Hau ba tasi buka ikan lori mai hau nia kaben mak faan, no ema neebe sosa nee husi Dili mai sosa hodi lori ba faan tutan. Maibe agora serka sanitariu, ami nia rendimentu laiha,” nia salenta.

Peskador nee hatutan, estadu emerjensia ida nee husu ba governu loke netik dalan, para komprador sira atu ba sosa sira nia ikan, hodi sustenta sira nia familia.

Nia sublina, desde Segunda too ohin loron sira seidauk ba tasi.*

Reportajen: Maria Tavares/Efizenia Da Costa
Editora: Domingas Gomes

LEAVE A REPLY

Please enter your comment!
Please enter your name here