Serka Sanitaria Tenke Apoiu Kondutor Taxista

Xefe Bankada PD, Antonio da Conceição. (Foto: Espesial)

DILI, STLNEWS.co – Iha situasaun serka sanitaria governu presiza fo apoiu ba kondutor taxista, tanba sira nia moris depende ba rendimentu lor-loron.

Kestaun nee fo sai husi Deputadu Bankada PD, António da Conceição iha Parlamentu Nasional, foin lalais nee.

“Serka sanitaria nee diak atu prevene povu husi surtu Covid-19, maibe triste ho kondutor taxista (trasnporte publiku), tanba sira nia moris depende ba rendimentu diariumente, bainhira halai kareta mak foin hetan osan ba han hemu, maibe ho serka sanitaria halo atividade paradu, oinsa sira atu sustenta moris, tan nee presiza governu nia tulun durante establese serka sanitaria,” dehan deputadu Antonio.

Nia afirma kondutor sira neebe halai taxi no mikrolet sira nia moris depende ba rendimentu neebe sira hetan kada loron, maibe ho serka sanitaria halo transporte la lao, ida nee bele fo impaktu ba moris povu kiik nian.

“Hau sujere ba governu atu tau matan ba povu kiik sira, karik serka sanitaria nee too semana ka fulan, ida nee sei fo impaktu ba moris povu kiik sira neebe hetan rendimentu depende ba atividade lor-loron nian, tan nee sebele governu fo netik apoiu humanitariu ba kondutor taxista sira, laos atu fo apoiu neebe boot maibe bele hakman netik sira nia pezu loron ida ka rua nian durante serka sanitaria,” dehan Deputadu António da Conceição.

Iha fatin hanesan Deputadu Jose Virgilio hatutan, problema neebe povu kiik sira hasoru iha baze nee, laos kondutor taxista sira deit, maibe negosiante kiik neebe faan modo iha merkadu mos, sira nia moris depende ba rendimentu diariu.

“Hau hanoin atu rezolve problema povu nian mak governu tenke foti medidas ruma apoiu humanitariu ba povu kiik sira neebe presiza aihan, selae mak moras Covid-19 seidauk hamate ema, maibe povu bele mate tanba hamlaha, tan nee presiza atensaun husi governu,” dehan deputadu nee.*

Reportajen: Madalena Horta
Editora: Carme Ximenes

LEAVE A REPLY

Please enter your comment!
Please enter your name here