Sesta Bazika Hariku Ema Neebe Moris Diak

Diretor Asosiasaun HAK, Sisto dos Santos. (Foto: STL/Claudios de Jesus)

DILI, STLNEWS.co – Sosiedade Sivil Asosiasaun HAK deskonfia programa sesta bazika mafia, tanba programa nee lahakbiit ema kbiit laek neebe presiza hahan, maibe kontinua halo riku ema sira neebe moris diak ona.

Kestaaun nee hatoo husi Diretor HAK, Sisto do Santos ba STL, iha nia knaar fatin, Farol, Dili,Tersa (02/03/2021).

Nia dehan, sesta bazika ida nee nia objetivu ema seidauk hatene lolos, uluk dehan programa sesta bazika nee atu hakbiit ema kbiit laek sira, maibe agora lae, halo ema riku fali tan ema sira neebe moris diak ona, neebe sesta bazika nee rasik ita bele dehan dezastre ida.

“Ami hanoin katak se estadu labele ona atu sustenta programa sesta bazika labele obriga, HAK deskonfia nee mafia, se ita hatene katak nee lafo haan ba ema sira neebe maka presiza hahan, maibe sei kontinua nafatin hela hakarak sosa nafatin produtu hirak nee, nee mafia,”dehan nia.

Sisto hatutan, fo haan ba ema ida neebe hamlaha, laos ida neebe bosu ona fo haan nafatin, tanba nee programa sesta bazika nee presiza halo avaliasaun jeral, estadu tau matan duni atu hakman ema ida neebe kbiit laek, ema ida neebe maka presiza duni hahan.

HAK hanoin katak se estadu labele ona atu sustenta programa sesta bazika labele obriga, tanba HAK observa katak lafo haan ba ema sira neebe maka presiza hahan, maibe sei kontinua fo haan ida neebe bosu ona.

Tanba nee Proteje Direitus Humanus i Justisa (PDHJ) tenke halo investigasaun, se wainhira PDHJ lahalo investigasaun sira mos komete hela mafia hotu.

“Ami husu hela PDHJ atu halo investigasaun implementasaun sesta bazika, tanba iha terenu hatudu katak produtu balun ladignu ona lamerese ona atu distribui ba ita nia komunidade sira, maibe kontinua fahe, tanba nee PDHJ tenki halo intervensaun,” Sisto afirma.

Nia hatutan, iha komunidade balun rejeita programa sesta bazika, tanba sira laos animal hahan neebe fo ba sira mos haan ba deit, maibe sira ema no sira hatene hela katak saida maka agora lao hela iha teritoriu laran nee.

“Se iha komunidade A nia produtu diak los, maibe iha fali komunidade area B ka C diferente ho ida komunidade A nee, tanba nee hanoin katak tenki uniformiza ita nia produtu ida neebe maka atu fahe ba ita nia komunidade sira,” nia esplika.*

Reportajen: Santina Castro
Editor: Ekipa STL

LEAVE A REPLY

Please enter your comment!
Please enter your name here