Sesta Bazika Tenke Fo Importansia Produtu Lokal

Deputada Bankada CNRT, Virgina Ana Belo. (Foto: Quochoi.VN)

DILI, STLNEWS.co – Programa sesta bazika tenke fo importansia ba produtu lokal, neebe produs iha rai laran laos produtu importasaun.

Deputada Bankada CNRT, Virginia Ana Belo hatete, empreza balun produs mina nu iha Lospalos no governu ba husu, atu produs halo barak hodi distribui iha programa sesta bazika, maibe ba sosa dala ida deit no too agora kompania distributor sira la sosa ona.

“Hau hanoin programa sesta bazika nee ita tenke dezenvolve produtu husi rai laran, ka produtu neebe povu agrikultor sira produs, maibe realidade empreza nia mina nu nakonu hela iha armajen, no kompania distributor sira ba sosa fali mina husi rai liur hodi lori mai fahe ba benefisiariu sira,” dehan Deputada Virginia, liu husi sesaun plenaria, PN, Segunda (01/02/2021).

Nia hatutan programa sesta bazika nee atu halo rekuperasaun ba ekonomia iha rai laran, maka governu tenke apoiu mos empreza Timoroan sira, tan nee sosa produtu neebe Timoroan sira produs, laos sosa fali produtu importasaun hodi fahe ba venefisiariu sira.

Iha fatin hanesan Deputadu Abel Pires hatete, programa sesta bazika ho intensaun atu apoiu povu kiik sira no atu rekupera ekonomia iha rai laran, maibe husu atu tau importansia ba produtu lokal iha rai laran.

“Ita nia kompania nasional sira produs ona hand sanitizer, ka produtu neebe bele uza hodi halo prevensaun ba corona virus, maibe produtu hirak nee, kompania distributor sira la sosa, sira ba sosa fali importasaun, no governu ba husu atu hasae kuantidade produsaun, no sira hasae tiha governu la sosa, agora hand sanitizer stok nakonu hela iha armajen,” dehan Deputadu nee.*

Reportajen: Madalena Horta/Domingas Soares
Editora: Carme Ximenes

LEAVE A REPLY

Please enter your comment!
Please enter your name here