Sesta Baziku Benefisia Governante

Programa sesta baziku neebe implementa iha rai laran fo benefisiu ba governante sira, tanba bainhira Ministru ho Sekretariu Estadu ba fahe aihan (Sesta Baziku-red) ba povu staf ka funsionariu tenke tuir. (Foto: Facebook)

DILI, STLNEWS.co – Programa sesta baziku neebe implementa iha rai laran fo benefisiu ba governante sira, tanba bainhira Ministru ho Sekretariu Estadu ba fahe aihan (Sesta Baziku-red) ba povu staf ka funsionariu tenke tuir.

Camilo Ximenes, hanesan akademia hatete, implementasaun programa sesta baziku idaea neebe diak, maibe programa nee fo benefisu deit ba governante ho staf sira, tanba governante ba sesta baziku maka nia staf sira tenke tuun hotu kedas, nee fo sasan ba komunidade kuaze $25 dolar nian, maibe $75 dolar nee bele tama ba Ministru ho nia funsionariu sira.

“Hau hanoin programa sesta baziku nee diak, maibe fo benefisia ba governante ho nia staf sira, tanba sesta baziku nee lao iha fatin ida nee, laos Ministru deit maka ba, maibe nia staf sira kuaze tun hotu kedas, tanba nee tenke sura mos sira nia perdiam karik kartu Diretor ruma maka tenke simu $ 60 dolar kada loron, no membru sira tenke simu $ 40 dolar kada loron,” dehan Camilo ba jornalista, bainhira sai hanesan orador ba lansamentu atividade advokasia ba governasaun diak, neebe organiza husi USAID Timor Leste, iha Timor Plaza, Dili, Segunda (16/11/2020).

Nia afirma programa sesta baziku nee lao iha Munisipiu ida maka too loron rua ka tolu osan nee tenke ba fali iha Ministeriu no hela ba komunidade sira nee la too $ 50 dolar, tan nee benefisia ba governante ho nia staf sira deit benefisia ba povu laiha no fo fali oportunidade ba ema atu halimar iha laran.

Antes nee reprezenatnte governu, atual Ministru Ekonomia Ekonomia Dezenvolvimentu, Joaquin Amaral hatete, politika governu nian maka atu halo rekuperasaun na ekonomia. Tan nee ho programa Sesta baziku bele apoiu netik povu sira iha baze.

Presiza Hamutuk
Iha parte ketak Primeiru Ministru, Taur Matan Ruak hatete, presiza hamutuk nunee bele fahe nesesidade baziku ba komunidade ho susesu.

“Prosesu ida nee prosesu ida neebe mak premeiru ita halo todan, entaun ita presiza hotu hotu serbisu hamutuk atu bele susesu, tanba projetu ida uluk ita halo cash transfer ba ita nia populasaun nee ba anivel familia agora nee ba ema ida,” hatete PM Taur.

Xefe governu hatutan, foin lalais iha dadus inisial iha populasaun iha Timor tokon 1.3, maibe informasaun agora sae tiha ba tokon 1.5 nee laos prosesu ida neebe kmaan, tanba nee mak presiza involve ema hotu.

“Nunee mos kona ba ida reklamasaun sira lolos horiseik komesa ona, maibe iha prosesu tekniku balun neebe sei demora oituan, maibe hau fiar katak ita sei hadia lista hotu tanba lista nee tenke mai husi Ministeriu Estatal mak komfirma lista sira hotu ona mak mai entrega ba iha Ministeriu Solidaridade Sosial para bele halo transferensia osan,” katak Taur.

Primeiru Ministru mos apela ba inan aman no sidadaun hotu pasensia hodi hein, tanba governu sei lahaluha buat neebe mak sidadaun sira nia direitu.*

Reportajen: Madalena Horta/ Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here